Problema sa apelyido

Dear Atty. Divine,

Duna koy pangutana labot sa akong apelyido nga gigamit. Pagkatawo man gud nako wa pa makasal ang akong mama ug papa. Hinungdan nga ang apelyido nga akong gigamit ug mao sab ang anaa sa akong Birth Certificate mao ang apelyido sa akong  mama. Sa dihang nakasal na  ang akong mama ug papa, wa gihapon mausab ang akong apelyido hangtud nga naminyo ko ug ang akong mga anak karon ang ilang middle mao ang apelyido sa akong mama kay mao may akong gigamit lakip na sa akong passport ug sa tanan nakong government issued ID. Ang akong pangutana kun okay ra ba kun di na nako usbon ang akong apelyido? Dili ba maproblema ang akong mga anak sa ilang gidala nga middle name nga apelyido sa akong mama ilabi na kun pananglit mo-abroad sila? Hinaut imo kong mahatagan og katin-awan. Daghang Salamat. —Jana

Dear Jana,

Kun ang tanan nimong records nagtakdo nga diin ang apelyido sa imong inahan ang imong gigamit lakip na sa imong passport ug mga government issued ID, then dili ra ka maproblema niini . Hinuon kun gusto gyud ka nga ipausab, mamahimo man nga imong usbon ang imong apelyido gamit ang surname sa imong papa pinaagi sa pag-process ngadto sa Local Civil Registrar sa imong legitimation. Duna man na silay list of requirements nga dapat nimong i-comply kay na legitimated man ka sa dihang nakasal ang imong parents,  apan kun mausab na ang imong apelyido, kinahanglan sab nimong usbon ang tanan nimong mga records. Sa kaso sa imong mga anak, wa ra sab koy nakita nga problema niini  as long as magtakdo sab ang ilang record sa imong record, so for me, mas maayo nga imo nalang  ipadayon ang imong naandan nga gigamit nga apelyido kay mas daghan ka og usbon kun imong  ipausab ang imong apelyido kay maapektuhan man sab ang records sa imong mga anak, so kinahanglan sab nimong pailisan ang ilang middle name .Wa ra sab koy nakitang problema bisan pa kun mo-abroad sila basta pareho lang ang tanan nilang records sa imo nga records. Thanks and God Bless. —Atty. Divine

Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.