Samsam nadismaya

Mahal ni Talisay City Mayor Samsam V. Gullas Jr. ang tanang Talisaynon nga ubos sa iyang pagpangamahan. Ning pagbutho sa COVID-19 nga walay kukaluoy’ng motakboy ug mopatay’g tawo, gusto niyang maprotektahan sila sa mapinanggaon niyang mga kamot pinaagi sa pagpapuyo kanila sulod sa tagsatagsa nila ka panimalay.

Busa, hugtanong gi-implementar ang Enhanced Community Quarantine (ECQ) sa iyang siyudad. Gipakatap niya sa kadalanan ang kapolisan aron mahipos ang wala tugoting maggawasgawas sa ilang balay.

Gipabaha niya ang iyang gugma pinaagi sa paghatag og relief goods ngadto sa tanang nanginahanglan (pobre man o nahitalay sa middle class), aron pagseguro nga magpuyo ang tanan sa balay.

Usa ka retired teacher nga anaa magpuyo sa Talisay City, katulo na makadawat og hinabang gikan sa siyudad sa Talisay sama sa mga kabos nga katulo ka beses na usab nakapahimulos.

Gani, iyang daughter in law nga taga Banawa, nakakomentariyo:

“Nindota didto sa Talisay, uy! Sige man lang sila’g kadawat. Honest man god na si Samsam.

Mao nga mahatag gyod tanan, ang para sa katawhan. Hasta iyang suweldo, giapil pa!”

Ingon niini ang pagpaningkamot ni Samsam aron ang tanang Talisaynon matunolan og kinasingkasing abag. Buwahan, dili manggawas sa balay. Ug dili maigo sa COVID-19.

Apan niining bag-o, ang usa ka bulang rekord sa Talisay City nga walay nagpositibo sa COVID-19 sa ilang dapit, kalit lang gipusgay sa usa ka residente sa Barangay San Roque, kinsa namatud-ang nataptan sa nahisgotang kagaw.

Human sa contact tracing, nasayran nga ang maong pasyente nakaadto’g Barangay Inayawan niadtong Abril 18 ug sa San Roque Barangay Hall niadtong Abril 25.

Haskang dismayaha ni Samsam. Niya pa, ay: “This is a difficult time of our city.

I ask all of you to stay at home. Because you never know that while you are following the instructions and guidelines set by government, basin naay wala mosunod ana. Kon ang usa dili mosunod sa guidelines set by government, ubay-ubay ang ma-affected.”

Puwerting paninguha ni Samsam nga dili na masudlag COVID-19 ang tanang Talisaynon, kinsa gialirongan-gakos sa iyang mga executive orders, apan may nakalusot gihapon.

Kaanugon sa iyang mga sakripisyo ug kahago nga wala hatagi og respeto. Kaanugon, sa iyang pagkabuotang amahan!