Mangapriso gyud mo

Sigurado ko nga kon tinud-on lang gyud pag-imbestigar, daghang kadagkoan sa Department of Social Welfare and Development (DSWD) ug mga opisyal sa kabarangayan, mapasakaan og kaso kay nagpataka lang pagpanghatag sa gitawag og Social Amelioration Program (SAP).

Daghan kaayo ko’g nadawat nga mga reklamo gikan sa publiko nga nagtug-an nga may mga nahatagan og hinabang gikan sa kagamhanan nga unta sila mga “disqualified” man, kay dunay mga anak nga nagdawat pa og sweldo, ug ang uban may sakop sa pamilya nga tua’s abroad.

Ang nakaproblema lang mao nga sagad sa mga mireklamo, talawan nga magpaila. Gusto ra nila nga “dawat ra sila’g limpyo” nga ang media ra maoy saligan sa ilang reklamo. Gani, ang akong ig-agaw nga tua nagpuyo sa Barangay Giloctog, Barili, mitawag kanako kagahapon.

Nagreklamo kini nga siya gipa-fill up og application alang sa Special Amelioration Program apan wa siya maapil bisan og apektado siya sa gipatuman nga Enhanced Community Quarantine. Ang iyang bana usa ka construction worker ug naundang sa trabaho dihang gipatuman ang ECQ.

Dunay iyang mga silingan nga mmay mga anak nga nagtrabaho pa “on line” ug ang uban may bana nga tua sa abroad, naapil man nga gihatagan og tabang salapi gikan sa kagamhanan. Akong giingnan nga mobarug og ilhon ang maong mga unqualified unta nga modawat sa hinabang, apan nakadawat.

Mihatag man tuod kini sa ngalan apan mahadlok nga magpaila kay basin kuno’g masuko ang mga hingtungdan. Mao nay problema kay mag-unsa man kon moreklamo apan talawan kamo mobarug aron masilotan ang mga opisyal nga mipabor sa ilang mga suod aron makadawat sa hinabang?

Awhag nako kaninyo nga barug ug ayaw kahadlok! Kon mahadlok kamo sa pagtug-an sa mga daotang binuhatan sa inyong mga opisyal sa kabarangayan, natural nga dili usab sila mahadlok nga magbinuang.

* * *

Karong tunga-tunga sa Mayo, mora’g mohinay-hinay na sa pagpangabli ang pipila ka mga balay patigayon dinhi sa mga siyudad sa Mandaue, Lapu-Lapu ug Cebu.

Gitawag nila kini og Bayanihan Balik Buhay Program kay ang mga mayor sa tulo ka siyudad, miangkon nga dili na sila makalahutay sa paggasto aron hatagan og mga pagkaon ang mga kabus nilang mga lumolupyo.

Nindot sab kay gikauyonan nga ang mga tagdumala sa lainlaing kompaniya, mamalit og mga Covid Testing kits aron sutaon kon ang ilang mga kawani nga patrabahoon na pagbalik, wa matakboyi sa mananakod nga sakit.

Unta, sa pagpatuman sa kagamhanan og Modified Community Quarantine, dungan unta nga mous-os na ang problema sa pagkuyanap sa Coronavirus Disease dinhi sa tibuok Sugbo.