Sayop gyud kaayo ang gihimo niadtong tawo nga nagbantay sa entrance/exit sa Sitio Callejon sa Barangay Labangon nga wa niya pasudla ang usa ka nurse nga gipadala didto aron unta pagtuman sa iyang katungdanan.
Makasabot kita nga mahadlok tingali sila kay anaa man sa ilang hunahuna nga basin og may coronavirus ang maong frontliner, apan ila usab unta nga hunahunaon nga kon may virus pa ang maong nurse, dili na unta kini mo-duty pa.
Mikuyanap na pag-ayo ang coronavirus diha sa pipila ka dapit sa Labangon, ilabi na sa Sitio Callejon, mao nga ang mga nurse gipadala didto aron nga mohimo og massive testing sa pag-ila sa ubang positibo aron sila ibuwag sa maong lugar.
Ang gihimo sa maong tawo, tabla ra nga gusto niyang mokuyanap pag-ayo ang coronavirus sa maong sitio, ug nga mokatap pa kini sa ubang mga dapit sa barangay. Unta, kakuhaan og pagtulon-an sa uban ang maong hitabo.
Karon, gimando na ni Mayor Edgar Labella nga imbestigahon ug ilhon ang maong tawo, ug tingali, pangitaan siya og kaso nga ikapasaka batok kaniya. Kamo nga mga nagbantay sa mga entrance/exits sa mga dapit, leksyon ninyo kini.
* * *
Sa akong pagtimbang-timbang, kon likayan lang gyud nato ang pagsuroy sa mga dapit nga dunay daghang tawo nga wa nato masiguro ang ilang kahimtang sa panglawas, mora’g malikayan man gyud tingali ang coronavirus.
Tuohi ko ninyo, dia ra gyud ko sa akong payag nagpuyo, apan nangita og mga trabahoon. Wa ko magsige og higda aron nga dali ra ang pagsibog sa taknaan ug sa mga adlaw.
Kon mogawas man ko, kana ra gyud nga dunay importante kaayo ug nga mobalik dayon ko. Red quarantine pass pa gani na ang ako, ug nga pwede ra man gani mi nga mga sakop sa media nga wa na lay pass, apan dili gyud ko mosuroy.
Pagsuwat nako niining maong lindog, 501 na ang nangamatay sa atong nasud tungod sa coronavirus ug ang mga confirmed COVID-19 cases, niabot na og 7,579. Ayaw paghimo’g lakang nga madugang ka sa statistics sa DOH.
* * *
Daghan na kaayong mga driver nga mitiyabaw kay gisakmit ang ilang mga lisensya ug unya pa nila kini makuha pagbalik kon malibkas na ang quarantine ug mobalik na pag-abli ang mga opisina sa LTO.
Dugay ra kaayo ko nga nag-warning sa mga driver nga ayaw gyud kamo pag-abuso nga madakpan mo sa mga LTO deputized agents, sama sa mga polis kay dili na gyud hinoon mo maka-drive kay wa na man mo’y lisensya.