EDITORYAL - Maayong paluagan ang ECQ

Ang Malacañang sa miaging adlaw miingon nga wala sa gustong ipatuman sa mga eksperto sa Department of Health ang pagrekomendar og total lockdown. Maayo kini nga senyales. Sa dihang gideklarar ang enhanced community quarantine didto sa Luzon niadtong Marso nisunod sab ang mga rehiyon sa nasud.  Ang ilang pagsunod sa ECQ nakapugong sa pagkatap sa COVID-19 sa ilang lokalidad mao nga  mas daghang mga  lugar ang walay kaso niini dinhi sa Pilipinas.

Apan tungod sa ECQ naapektahan sab ang kinabuhi sa mga tawo kay apektado kaayo ang ilang panginabuhian ug nihunong ang ilang ekonomiya sa pagtuyok.  Karong natumbok naman kun asang mga lugara ang dunay mga kaso sa coronavirus, sama dinhi sa Sugbo, ang naigo gyud mao ang Cebu City, Lapu-Lapu City ug Mandaue City, kaning mga lugara lang ang magpabiling hugot ang pagbantay.

Dili makasusitinir ang gobiyerno og ingon niini kalaygay nga krisis, nga ang pundo nagkaanam og kahurot gikan sa tambal ngadto na sa paghatag sa batakang panginahanglan sa mga tawong nagpundo sa balay kay dili naman sila makapanginabuhi.

Maayo tingaling hinay-hinayan na pagpaluag ang gipatumang ECQ sa mga lugar nga walay kaso sa COVID-19.

Kinahanglan lang estriktuhon ang ilang mga utlanan nga di magpasulod gikan sa mga dapit nga dunay kaso sa maong virus aron dili sila matakboyan. Ipatuman gihapon ang estriktong pagbantay.

Dako kini og matabang sa gobiyerno, mogamay nalang ang mga tawong kinahanglang suportahan sa pundo niini ug mapokus ang ilang atensyon sa mga lugar nga duna pay COVID-19. Sa samang higayon, motuyok og balik ang ekonomiya sa nasud bisan dili 100 porsiyento sama sa naandan.

Kay sa pagkakaron, bisan kadtong mga maguuma ug mananagat bisan apil sa mga exemptions, magpanagana man paggawas aron mananom o managat kay basin dakpon o ba kaha maglisod sila paghatud sa ilang mga abot sa kamerkadohan.

Ang World Health Organization nag-ingon nga layo pa sa tinuod ang kombate batok sa coronavirus (COVID-19) kay wa pay tambal o bakuna batok niini. Apan ang ginagmay nga pinitik sa ekonomiya makatabang paglahutay sa mga gagmay nga nasud sama sa Pilipinas.