Kaugalingon ang gitan-aw sa gihapon

Dili ikalimod nga daghan sa mga tawo karon ang nahimong focus kaayo sa ilang kaugalingon. Kaugalingong kaluwasan, pagkaon, ug uban pa. Hangtud nga nahikalimot kita sa uban.

Ning maong kahimtang atong nakita karon ang dakong purohan nga imbis mohunahuna sa uban nga mas lisud pa kay kanato, ato mang gihunahuna ang atong kaugalingon lamang. Ang pait pa gyud niini nga dunay uban nga nataptan sa COVID-19 ang wala nuon makadawat sa hustong pagbati gikan sa ilang isig kaingon.

Didto pananglit sa Iloilo dunay pamilya kang kansang pinuy-anan gibato sa mga silingan kay lagi sila napamatud-an man nga dunay COVID-19. Hinuon dili kita maka-blame kang bisan kinsa kay dili pud lalim nga mataptan ning sakita.

Apan ang pangutana nganong gipapauli man pud ni sila? Ang posibleng tubag mao nga tingali puno na pud ang mga tambalanan mao nga home quarantine na lang gyud sila taman.

Grabe kaayo ang atong nahiagoman karon apan sa akong pag-scroll sa FB akong nakita ang usa ko ka higalang babaye nga gikan pagsugod ning maong COVID-19 busy gihapon siya paghimo og selfies. Iyang gihisgutan sa gihapon ang iyang nangagi apil na ang nahitabong pagkapakyas sa iyang gugma. Hinuon ingon ana siya ka affected sa ilang relasyon. Kutob ra gyud siya sa pagpatagad.

Sa laing bahin, dunay uban usab nga tungod sa kwarentinas magpunay na lang pud sa ilang gikaon anang adlawa. Nagkadaiyang mga pagkaon ngadto ngari. Gani ang uban mipatotsada nga ilang gininhawa ug utot karong panahona mura na og tinapa.

Ingon ini gyud ang dagway sa atong kalibutan karon. Wala ko moingon nga dautan ang pagbaton og bisan unsa ilabina kun kini atong hinagoan. Apan sa laing bahin mas maayo nga batonan usab ang sensitivity diin nakigduyog kita sa uban nga wala pinaagi sa paghimo niiini nga pribado. Kay ang pagpaganyar usahay sa imong kabtangan usahay maoy hinungdan kun nganong ang uban nga nakulangan gawas nga masina ang mangita og paagi aron kawaton ang bisan unsa nga imong nahuptan. Angkonon nato nga dili tanang tawo duna karon niining panahon sa kalisdanan.

Sa akong bahin, sa dihang gihatgan ko og pila ka sakong bugas ako kining gibahin bahin ngadto sa ubang mas nagkinahanglan pa kay kanako. Dili man tuod nako mahimo ang tanan apan naningkamot nga mopaambit kun unsay anaa. Kay ang pagkamanggihatagon dili man mahitungod sa paghatag kun unsay sobra kondili pagpaambit pud gikan sa bisan unsa nga giisip natong mahinungdanon kaayo alang kanato.

Nagpasabot kini nga ato kining gipakapinan og gugma. Ug kay gugma man ang sukaranan ang maong pagsakripisyo mamahinmong mas makahuloganon alang kanatong tanan.