Ang iyang gi-send sa ako Messenger

Duna koy higala nga magsige og send og mga hulagway sa mga lamiang pagkaon sa akong Messenger. Tingali nagpagarbo siya nga bisan sa kahagip-ot siya nakakaon gihapon. Ako siyang gipangutana kun iya ba kining gi-send usab sa uban. Siya mitubag og Oo! With smiling emoji pa.

Apan ako siyang gibadlong ug giingnan nga ning panahon sa pandemonyo, dili maayong mag-iningon ana tungod kay daghang tawo ang nagpangita og makaon.

Ug daghan sa mga tawo ning panahona ang nagkalisud. Sama ra nga imo silang gipalaway kay ikaw anaa apan sila wala. Wala na siya mo-reply pa.

Kinahanglang mamahimong sensitive unta kita sa dakong panginahanglan sa mga tawo ning panahona karon. Kini tungod kay ang mas gikinahanglan ron mao ang solidarity sa usag usa kanato nga nahiagom ning maong katalagman.

Subo palandungon apan mao kana ang tinuod. Daghan nato ang nahimong insensitive sa gibati ug kahimtang sa ubang mga tawo.

As if alang nato mura og competition ang tanan. Kun kinsa toy daghang pundo, kun kinsa tong negatibo, kun kinsa tong positibo ug uban pa. Kun kinsa tong PUM O PUI. Sakit apan maoy tinuod.

Dili tiaw ning hitaboa. Kun magkataas ang rating sa mga natakdan sa COVID-19 nahimong mas mosaka usab ang kahadlok ug kalisang nga nasinati.

Ang tanan nahimong abnormal karong mga higayona kay bisan gani ang diyotay nga ubo makapahimo man nimong suspetsado ning makalilisang nga pandemonyo.

Ang  mga frontliners nga daw gidul-it ang ilang kaugalingon sa kamatayon ang wala mahatagi og igong kaangayan kay kun tan-awon nato ang mga tawo nga mga beneficiaries sa 4Ps nagsugal hinuon ang uban.

Kining maong pamaagi maoy nakapahimo sa kadaghanan nga tapulan. Kusog kaayo mohangyo apan diay dili pud maningkamot aron sa ingon mamahimong dunay matampo alang sa kinabag-an.

Kun padayon nga ingon ini ang atong batakang panghunahuna padayon kitang mag-ilaid ug sa atong pag-ilaid padayon kitang mawad-an og gana nga magpakabuhi.

Kun sa imong pagpunay og panghambog sa imong lamiang kalan-on nahimo bang makahuloganon ang imong kinabuhi ingon nga Pilipinhon?

 Mao nga alang nako dili maayo nga magpaka-okay kita samtang ang uban ning panahona nagbangotan sa hilabihan. Ug kadto usab untang gipangtabangan dili unta magpunay og pabuyag kay kon dili man mo mapuslan maayo pa og gairon mo sa hilabihan.