Daghang pangutana

Mas daghan ang mga pangutana nga angayang kahatagan og klarong tubag ug katin-awan sa mga opisyal sa dakbayan sa Sugbo ug sa Department of Health karon nga misulbong og maayo ang mga kaso sa COVID-19 ug gipaubos sa total lockdown ang Barangay Luz.

Ang mga opisyal sa barangay nga gipangulohan ni Kapitan Ronilo Sab-a supak unta nga i-lockdown ang tibuok barangay tungod kay ang mga kaso tua ra man sa Sitio Zapatera nga maoy unang gi-lockdown niadtong Easter Sunday.

Giangkon sa kapitan dili sila andam sa hingpit nga lockdown bisan gani sa Sitio Zapatera lang nga dunay gibana-banang 9 mil ka mga pamilya.

Nag-una niyang problema unsaon pagpakaon ang iyang mga molupyo kun sila hingpit nang pugngan nga makagawas aron pagpalit sa ilang mga gikinahanglan sama sa pagkaon.

Gihunong sab sa City Health Office ang mass testing ubos sa mando sa DOH tungod kay giisip na ang tibuok Sitio Zapatera nga infected sa kagaw sa COVID-19.

Dinhi nagsugod ang daghang mga pangutana sa mga molupyo sa barangay.

Una—hatagan ba sa barangay o sa syudad og pagkaon ang tanang molupyo nga apektado sa lockdown?

Ikaduha—kun abagahon sa dakbayan ang ilang panginahanglan, hangtud kanus-a, ug duna bay igong pundo ang dakbayan alang niini?

Ikatulo— karon nga gihunong ang mass testing diha sa Sitio Zapatera ug giisip nga “infected” ang tibuok dapit, nagpasabot ba nga giisip sab nga positibo sa COVID-19 ang tanang molupyo? Kun giisip silang positibo, dad-on ba sila sa mga facilities sa gobyerno aron malikayan nga makatakod og laing tawo?

Pipila lang ni sa daghan pang kutay sa mga pangutana tungod sa kasamtangan nga sitwasyon diha sa Barangay Luz.

Dili sayon ang kahimtang karon sa mga molupyo sa maong barangay. Apan labaw nga di sayon alang sa mga opisyal sa barangay ug sa dakbayan pagtubag niining tanang mga pangutana.

Sa maong sitwasyon gikinahanglan ang lig-on nga baruganan sa usa ka lider. Dinhi ato unyang masukod unsa ka lig-on ang liderato sa syudad.

Sa pikas bahin, ang sitwasyon sa Barangay Luz angayang kakuhaan og leksiyon sa tanan nga kun magpadayon ta sa kagahi sa atong ulo ug di mosunod sa mga lagda sa ECQ, di layo ang posibilidad nga kini ato sab nga mahiaguman. Anaa nato ang disisyon sa pagpili.