EDITORYAL - Naleksyon na unta

Mabatyagan karon nga daw nakaamgo na ang mga tawo sa kaseryuso sa problema dala aning coronavirus COVID-19, ilabi na dinhi sa Dakbayan sa Sugbo, bisan pa man adunay pamahayag sa kaulohan nga dunay posibilidad nga mag-partial lifting sa enhanced community quarantine sa pipila ka mga lugar.

Ang Cebu City karon makonsiderar na nga maoy ‘epicenter’ sa Central Visayas tungod sa kadaghan sa mga natalang nagpositibo sa maong sakit ning nanglabay nga mga adlaw.

Bisan pa man sa nasinating kalisod ug kahadlok dili tungod lang sa virus kondili sa mismong kahimtang sa ilang pagpuyo tungod sa nagkanihit nang source of income, daghan ang gustong paluguwayan pa ang gipatumang enhanced community quarantine.

Ang mga aduna pay natagoang kwarta nakaingon nga mahimo pang iutong, samtang ang mga wala gyud intawoy panginabuhian karon ug wala gyud kadawat sa gipasiatab sa gobiyerno nga hinabang, igo nalang sab sa pagdawat sa kamatuoran sa ilang kahimtang.

Apan siguraduhon unta sa atong gobiyerno ug sa mga lokal nga pangamhanan ilabi na sa mga barangay nga suportahan ang plano sa nasudnong kagamhanan pinaagi sa aksyon ug dili lang kutob sa papogi points.

Kun unsa ang nigawas sa baba sa mga naa sa taas nga mga opisyal, mao usab unta ang buhaton sa ilang mga gitahasan diha sa ubos sama nalang sa pagpanghatag og mga hinabang sama sa bugas, groceries, financial assistance, ug uban pa.

Usa sa nakapagubot sa pagsugod niining ECQ mao man ang kalibog sa mga tawo kun asa modangop. Rason nga wala gyud matuman ang social distancing ug ubang protocol.

Labaw sa tanan, kadtong mga kritikal nga mga dapit sama sa Sitio Zapatera sa Brgy. Luz ug uban pang dapit nga gipaubos sa lockdown kinahanglang tutokan ug suportahan sa ilang panginahanglan sama sa pagkaon, tubig, tambal ug uban pa.

Ang katawhan mosunod man gyud baya, basta suportahan ug molihok ang mga gitahasang ahensya sab sa gobiyerno sa ilang mga tahas aron dili molighot ang mga apektado.