Samtang maabtan pa og gikan sa usa ka tuig ngadto sa usa ug tunga ka tuig ang mga paningkamot sa paghimo og bakuna batok sa Covid-19, nipahibawo ang World Health Organization (WHO) nga mahimong mas paspas nga makaplagan ang tambal pinaagi sa kalibotanong clinical trials nga gisalmotan sa nagkalainlaing kanasuran sa kalibotan.
Gitataw sa WHO nga samtang di malaktod ang proseso sa paghipos og igong mga ebidensiya sa di pa tugotan ang bakuna nga mosagang sa sakit, ang pagtinabangay sa kanasuran mahimong mas makapadali sa pagpangita og tambal sa Covid-19.
* * *
Pormal nga gilusad sa WHO ang Solidarity trial nga gisalmotan sa 45 ka nasud. Suwayan ang bag-o ug karaang mga tambal nga nagpakita og mga timaan nga epektibo batok sa pipila ka kaso sa Covid-19. Gidasig sa WHO ang Pilipinas ug ubang kanasuran sa pag-apil sa kalibotanong pagtuon aron nga mas daghan ang mga ebidensiya nga mahipos unsay labing epektibong tambal sa mas mubo nga panahon.
Gitataw ni WHO Director General Tedros Adhanom Ghebreyesus nga kon mas paspas nga makit-an ang tambal batok sa Covid-19 mas daghang kinabuhi ang maluwas.
* * *
Ang labing uwahing mga nasud nga niapil sa Solidarity trial mao ang Espanya ug Norway. Ug, sama sa naandan nga postura sa atong gobyerno sukad sa pagsugod og ulbo sa kalibotanong epidemiya, wa mag-apura ang Department of Health (DOH).
Matud ni DOH Undersecretary Maria Rosario Vergiere gitun-an pa nila kun angay bang dapatan sa gipilian nga mga tambal ang pipila ka pasyente sa Covid-19 sa Pilipinas aron matandi ang sangpotanan sa ubang kanasuran.
* * *
Naapil sa Solidarity trial ang upat ka tambal nga gipanghinaot nga human sa pagtuon usa nila o kumbinasyon sa pipila nila mapamatud-an nga hingpit nga makaluwas sa mga pasyente sa Covid-19:
• Remdesivir (nga gimugna sa mga siyentipiko batok sa Ebola apan wa kapasar sa clinical trials, may mga timaan hinuon nga epektibo batok sa coronaviruses);
• Chloroquine ug hydroxychloroquine (nakaplagang epektibo batok sa malaria sa nangaging mga dekada ug gisugyot sa pipila ka nasud nga mahimo sang gamiton batok sa Covid-19);
• Liponavir plus ritonavir (gigamit batok sa HIV infections); ug
• Lopinavir plus ritonavir ug interferon-beta (nga epektibo batok sa multiple sclerosis).
* * *