Diha sa kahilom ug kangitngit

Daw dili nako matugkad ang akong gibating kamingaw sa akong kasinatian sa kasamtangan. Kini ba kaha tungod kay nahimong awaaw ang palibot gikan sa mga kagahob nga dagitabnon ug ang mga palandras nga mga lakaw sa kabataan ug katawhan matag Domingo mao man ang nagsilbing musika sa akong hunahuna ug kasingkasing. Makaingon ko nga busy gyud kaayo ang parokya ug nahimo kining bibo sa daghang mga kalihokan labina kay hapit na ang semana santa dayon piyesta. Apan tungod ni Corona nahimong awaaw ang tanan.

Awaaw tungod kay malisud ang paggawas gawas karon. Kun unsa man kaawaaw ang gawasnong palibot ingon ana usab kasaba ang matag galamhan sa mga tawo bisan diin ning kalibutana. Kini tungod kay nihari ang naghinobrang kabalaka kun asa man kutob kining tanan ug unsay dangatan natong tanan.

Ang posibleng gutom ignon man ang dakong posibilidad sa gubat nga moulbo labina kun ang mga superpowers magpinahiray na sa iang mga sayop. Kinsay angay nga paninglon? Kinsay magbayad? Pun-an pa sa mga tawo nga gihimong usa trivia lamang kining maong pandemic. Ang paghimo niining usa ka trivia usa man ka dakong pagtalaw sa buhing kamatuoran nga anaa kita sa dakong kalisdanan.

Hinuon dunay uban nga sa tinguha nga mapagaan gaanan ang kasinatian sa krisis ila na lang kining gipaagi og tiktok, lingaw lingaw ginamit ang social media sa pamasin nga makapamenos sa gihambing mga kabalaka. Dako kaayo og kadaut si Corona. Iyang giguba ang kahimanan sa atong kalambigitan ingon man iyang giguba usab ang ekonomiya bisan asa. Sa laing bahin, diha sa kahilom atong:

1. Makita ang atong kaugalingon. Sa nanglabay nga panahon nahimo kitang pasagad ug wala kita makapangandam.

2. Nakita nga ang bili sa salapi usahay kwestiyonable kay mag unsa man tuod kun duna kay kwarta apan wala kay mapalit.

3. Nasinati nga dili diay lalim ang mamahimong halayo gikan sa atong mga mahal sa kinabuhi. Bisan gani ang gakus usa naman ka dakong imahinasyon.

Ning mangitngit nga anib sa atong kasaysayan atong gipangita ang matuod nga kahayag ug tinubdan sa atong paglaum.

Way lain kondili ang Dios mismo. Bisan unsaon nako og pakli ang breviary padayong walay kahulogan ang matag salmo nga akong pagabasahon. Mas nahimong makasulod ko sa mas personal nga kukabildo sa Ginoo. Ako siyang gipangutana kun nganong nahitabo kini apan bugtong kahilom lamang ang iyang gitubag. Ug unta kining maong kahilom magdala unta kanako og kalinaw.