Grabe na gyud kaayo ang pag-usbaw sa gidaghanon sa mga tawo nga natakboyan og Corona Virus Disease (Covid-19 dinhi sa atong nasud. Ang rason tungod kay hangtud karon, daghan pa gihapon nga mga tawo nga wa motuman sa awhag sa kagamhanan nga mag-self quarantine.
Nakahinuktok ko samtang nagtan-aw sa report gikan sa Department of Health nga kaniadtong Domingo sa hapon, miabot na sa 1,418 ang “confirmed Covid-19 cases” sa atong nasud, ug niabot na og 71 ang namatay sa maong sakit.
Kanunay man nako nga gibantayan ang statistics sa mga “new Covid-19 positives” ug nabantayan nako nga nag-anam kadaghan ang mga matakboyan kada adlaw. Kaniadtong Domingo, 343 ka bag-ong mga kaso sa Covid-19. Tingali karon misaka na sa kapin sa 500 kada adlaw.
Tinuod, dili gihapon kita makapaniguro nga kun anaa ka sa inyong panimalay dili ka na gyud matakboyan sa maong makamatay’ng sakit, apan bentaha na lang kay sa makighalobilo ka sa mga tawo nga wa nimo mahibaw-i nga nasakit na.
* * *
Kada barangay dinhi sa Dakbayan sa Sugbo gipanghatagan sa Cebu City Hall og tag-usa ka libo (1,000) ka sakong bugas humay. Gikan kini sa 100,000 ka sakong bugas humay nga gipalit sa kagamhanan sa siyudad sa Sugbo aron ipanghatag sa mga “poorest of the poor.”
Kay tag 25 kilos man ang ipahatag sa kada kabus nga pamilya, nagpasabot kini nga 2,000 ka pamilya ang makadawat sa tabang. Apan subo kaayo palandungon kay mora’g wa gyud mamaayo sa pagkilatis kun kinsa ang angay’ng hatagan.
Ang sipyat niini sa kagamhanan sa Dakbayan sa Sugbo kay ang pagpanghatag sa bugas humay gitugyan ra nila ngadto sa mga sakop sa MILO, kun Mayor’s Information and Liason Office.
Natural, dunay ubang mga nagdumala sa MILO nga ang ila ra nga mga dumadapig maoy giuna. Husto ang sugyot ni Yody Sanchez, pangulo sa MILO sa Barangay Busay, nga gibahin unta ang bugas.
Ang 500 ka sako adto ipiyal sa mga opisyal sa barangay, ug ang laing 500 ka sako nga bugas humay, adto usab sa MILO, unya magsabot sila kun asa nga sityo sa barangay sila manghatag aron dili magkadoble.
Nindot tuod kini nga paagi unta kay makita man nga karong panahona nagkahiusa ang MILO ug ang mga opisyal sa barangay, ug ihiklin ang pamolitika. Sayop ang gihimo karon nga kadto ra nga moduol ug mangayo’g bugas maoy hatagan.
Ang tukma unta nga ilhon gyud nila kun kinsa ang “poorest of the poor families.”