Sa giatubang nato nga krisis karon sa panglawas nunot niining Coronavirus Disease o COVID-19, walay gisanto niini diin tanan katawhan nameligro ang kinabuhi.
Bisan gani kadtong mga anaa sa taas nga hut-ong sa katilingban ug adunay gahum nangaigo man sa balatian.
Makaingon gani kita nga luwas kaayo unta ang ilang mga harianon nga panimalay kay kompleto sila sa kagamitan nga segurado gyud limpyo ang ilang palibot.
Aduna silay mga sulogoon nga tig trapo sa bisan usa ka lusok sa abog nga mobatog sa ilang pinoy-anan ug sanitized gyud kaayo ang ilang lawas kay armado sila kanunay batok sa mga mikrobyo.
Pabor usab kaayo kadtong mga gamhanan nga anaa sa gobierno kay gawas nga kwartahan dali ra usab kaayo sila makakuha og special treatment o access alang sa ilang kaluwasan.
Ang nahitabo nga nag-una sa pagpa-COVID test ang mga senador ug makuha dayon ang resulta samtang ang uban nangamatay nalang wala pa gyud masayri kon COVID ba gyud ang ilang namatyan.
Lahi na kaayo ang sitwasyon karon kay bisan unsa pa ka gamhanan o ka adunahan ang usa ka tawo dili gihapon maseguro nga makalikay siya sa peligro.
Gani sila man ang nauna og kaigo sa virus seguro kay sila man ang nakauna sa pagpa test kay naa lagi gahum ug kwarta.
Duna bitaw nangutana nganong sagad sa gitakboyan sa kagaw kadto man ang mga kwartahan?
Seguro tungod kay aduna man silay kwarta nga magamit sa paglupadlupad bisan asa nga nasud nga gusto nilang adtoon mao tingali nga silay unang nataptan sa balatian didto sa nasod diin sila nagpahangin sa ilang baga.
Pag-uli nila sa Pilipinas niuban pud ang mga kagaw nga maoy nikatap karon ug naghulga sa kinabuhi sa katawhan.
Luoy kaayo kadtong mga frontliners sama sa mga doktor ug nurses ug ubang mga medical staff nga maoy miatiman kanila ilabi na kadtong wala motug-an sa tinood nga suspected covid patient sila.
Kini ang hinungdan naay mga frontliners ang nagbuhis sa ilang kinabuhi sa pagsalbar sa mga tawo.
Samtang moingon ang uban nga karon patas ang tanan labi na sa gipatuman nga protocol, tinuod man kay walay gipili ang kagamhanan.
Apan sa kasayon ug kalisod wala gihapon mapareho kay kadtong mga adunahan nakapundo man og daghan pagkaon ug naa pa gyud mga sakyanan nga magamit bahala na og naay checkpoint ug quarantine pass.
Ang mga kabus intawon, nagsalig lang sa hinabang sa gobiyerno ug magbaklay o maglakaw pa gyud kon walay masakyan.
Karong panahona dili nalang ta mangkwenta basta magkahiusa sa pagpakigbatok sa atong kontra pinaagi sa pagsunod sa lagda.
Labaw sa tanan maghiusa sa pagsampit sa Dios nga iiway kita sa kagaw ug hingpit na kining mawagtang.