Pinoy delikadong mahurot

Matag adlaw nagkadaghan ang natakdan og corona virus (COVID-19) sa Pilipinas.

Hasta mga doktor nataptan. Ug duna gyuy naalaot.

Sa Manila, 150 ka doktor, apil na mga nars ug pipila ka kawani sa The Medical City sa Pasig ang gikuwarantina human mababad sa mga pasyenteng positibo sa palatakod nga COVID-19.

Pipila kanila gitaoran nag respirator timaan nga dili na normal ang pagginhawa.

Nganong paspas man ang pagtinakdanay? Ania ang tubag:

Dihang giimplementar dayon sa PNP, AFP, PCG, GOCCs, GFIs, SUCs ug LGUs ang Proclamation No. 929 ug 922 (s. 2020) ug Republic Act No. 11332 ni Presidente Rodrigo R. Duterte, diin hugtanay gyung ipatuman ang Enhanced Community Quarantine ug Stringent Social Distancing Measures sa tibuok Luzon ug National Capital Region, sugod 12:00am (Marso 17, 2020) hangtod 12:00am (Abril 14, 2020), daghan gihapon ang nagmasinupakon. Inay morespeto sa kamandoan, makiglalis pa hinuog polis. Ang pait, kay may nagprotesta pa!

Dili pareho sa China. Nga pag-ingon sa ilang presidente nga i-lock down ang kinatibuk-ang Wuhan, diin didto magsuod ang COVID-19, ang mga tawo, misunod dayon.

Haskang daliang namingaw sa kadalanan. Mga frontliners, kapolisan, military, medical professionals ug social workers, mao ray nagtikawtikaw sa karsada.

Kay kun adunay makitang mosupak? Aw, nahibawo na sila unsay mahitabo nila?  Komunista baya ang China. Busa, tanan nadisiplina.

Dinhi sa ato, kaya kaha ni? Ay, pastilan, mga Pinoy na-spoiled sa demokrasiya.

Bisag gimandoan nang Duterte nga papuy-on tanan sa balay kay naa pa si Covid-19 nagsigeg pangitag patyonon, daghan gihapong nagpayang-ang.

Giingnag wala nay mogawas sa balay gikan sa alas 8:00 sa gabii hangtod alas 5:00 sa buntag, anaa gihapoy magwandogwandog ug maghuboghubog.

Sa Sugbo, hasta kapila na hangyoa ni Gob. Gwen Garcia ug mga mayor sa silingang siyudad ang mga netizens nga likayan ang pag-post og fake news nga makapahadlok pagsamot sa katawhan.

Ay sus, mo-post gyud, uy! Maayo, kay na-trace ug nasakpan. Unta, mahatagag leksiyon.

Usab, social distancing, bisag gidili, anaa gihapoy manakay nga magdinikitay. Pastilan, kon magtinakdanay?

Unya, hasta tanang doktor mangatakdan sab, sama sa nahitabo sa Manila. Kinsa pa man unyay moatiman sa nahabilin?

Kun magpabiling dili motuman ang mga gahi, delikado kaayog kitang tanang Pinoy, mahurot.