Gamay na lang ang kuwang nga nganlan sa World Health Organization (WHO) ang mga nasud nga nagpaugat hangtod karon sa paglusad og mas agresibo nga pagpangita sa ilang mga molupyo nga nataptan na sa Covid-19 sa di pa sila makapanakod sa mas daghan.
Apan kay di man apil sa tahas sa WHO ang paghingan og mga ngan sa ilang mga panaway, kutob ra si WHO Director General Tedros Adhanom Ghebreyesus sa pagbalikbalik og pahinumdom sa labing dinalian, kusganon ug mahinungdanon nilang mensahe atubangan sa nisulbong nga mga kaso sa Covid-19 sa nagkalainlaing bahin sa kalibotan: “Test, test, test.”
* * *
Matud ni Dr. Tedros ang labing epektibo nga paagi sa pagbadlong sa pagkatap sa kagaw ug pagluwas og mga kinabuhi mao ang pagputol sa kutay sa tinakddanay.
Ug aron paghimo ana, kinahanglan nga ang kadagkoan sa gobyerno sa nagkalainlaing kanasuran motingob sa ilang panahon sa pag-testing sa tanang gidudahang natakdan sa Covid-19 ug sa pagbuwag ug pagtambal dayon nila.
Naalarma ang WHO sa pagdumili sa daghang mga nasud sa paggahin og igong pundo ug panahon (hinaot nga manlipaghong sa kauwaw ang Department of Health ug ang pamunoan ni Presidente Duterte) sa pagpangita sa tanang natakdan sa kagaw sa labing daling panahon.
* * *
Nipasidaan si Tedros nga di paigo ang kalibotanong kampanya sa social distancing, sama sa pagtak-op sa mga eskuylahan, pagkanselar sa dagkong kalihokan ug pagkandado sa mga patigayon nga tapokan sa daghang tawo.
Sa pipila gani ka nasud, sama sa Pilipinas, China, Italya, Espanya ug Pransiya, giselyohan nang mga dakbayan ug lalawigan.
Ang social distancing ug ang pagsige og hunaw sa kamot, matod ni Tedros, di paigo sa pagbadlong sa lokal nga tinakdanay sa mga molupyo.
* **
Nipasabot si Tedros nga di mabadlong ang Covid-19 kun di mailhan kinsa ang natakdan. Ang pagdeklarar og lockdown sa nagkalainlaing kanasuran, nga gitawag sa atong mga opisyal nga community quarantine, gihulagway ni Tedros nga sama ra sa pakig-away nga tinabonan ang mata.
Iyang gisubli ang panginahanglan sa pag-testing sa tanang kaso, di lang ang mga nipakita og grabeng mga timaan sa sakit. Iyang gibutyag nga nakapada na ang WHO og 1.5 milyones nga test kits sa 120 ka nasud.
* * *