Sa pagtumaw sa coronavirus (COVID-19) pandemic sa tibuok kalibotan nabantang og maayo ang kakulangon sa mga nagkalain-laing mga nasud, adunahan man o kadtong mga naa sa third world countries.
Gikan sa mga gamit, preparasyon, medisina, mga pasilidad ug bisan na gani mga polisiya sa ilang tagsatagsa ka mga gobiyerno kun unsaon pagsanta sa outbreaks sa mga sakit kun motugpa kini sa ilang mga dapit.
Dinhi sa Pilipinas, naigking ang mga tinugyanan sa panglawas niining pagsugod sa local transmissions sa COVID-19. Wala damhang kalit lang mga moburot ang gidaghanon sa mga natakboyan.
Sa sinugdanan sa buwan sa Enero, kompiyansa kaayo ang Department of Health pagbuhi og pasalig sa publiko nga takos ang Pilipinas nga mapugngan ang pagkuyanap niini dinhi. Apan samtang nagkagrabe na ang sitwasyon didto sa Wuhan City, Hubei sa China milanat pa og pipila ka semana ayha pa gidesisyonang di na pasudlan gikan sa maong dapit ang Pilipinas.
Apan sa wala pa kini himoa daghan nang mga langyaw, kasagaran mga Chinese ang nakasulod dinhi ug nisagol sa populasyon. Karon nagsugod na ang local transmission sa maong sakit, nakita ang kadako sa kakuwangon sa gobiyerno sa preparasyon.
Kay bisan ang mga basic nga mga galamiton sa tanang health personnel gikan sa barangay level hangtud na sa mga dagkong tambalanan nagnihit.
Hasta gani ang mga distributors ug mga dealers sa mga medical supplies sama sa surgical facemask, test kits, ug uban pang protective gears nahutdan na og supply.
Makaluluoy sab ang kapabilidad sa kadaghanan sa mga tambalanan sa mga rehiyon sa Pilipinas pagatiman sa mga pasyente sa COVID-19.
Dunay mga doktor ug medical staff apan siguradong magkuwang kini kun dinaghan na ang pasyenteng ma-admit kay di lang mga kaso COVID-19 ang ilang atimanon.
Sa paghimo palang og laboratory test sa mga swab samples gikan sa mga Persons Under Investigation (PUIs) sa COVID-19, didto lang kini himuon sa Research Institute for Tropical Medicine (RITM) sa kaulohan.
Sa ingon ani nga sitwasyon mas maayong dili gyud matakdan og COVID-19.