Daghan gikuhaag trabaho ni Covid-19

Nagpadayon ang nag-alburotong pagpanghasi sa corona virus (COVID-19) sa tibuok kalibotan. Hasta ang Estados Unidos, naalarma. Nangitag mga epektibong paagi aron ang grabeng pagpanakod niini, mapugngan.

Ultimong mga players sa National Basketball Association (NBA), gidid-an sa dili pakiglamano sa ilang fans, paggakos, pagpamirmag souvenir items o uban pang buhat nga adunay hugot panagdip-ig sa lawas o kabahin sa lawas, nga matod pa sa mga eksperto maoy hinungdan sa daling pagtinakdanay kon simbako, usa sa nahitipon sa pundok may corona virus na diayng sa hilom, naglublob sa iyang kahiladman.

Gani, mga kompaniya sa eroplano daw barkong mitakilid human hasmagi sa mapintas nga Covid-19. Tungod sa kahadlok nga malunod, kinahanglan nga iariya ang gatosan ka empleyadong daw wala nay gamit, aron makapadayon sa ilang paglawig. Niadtong Pebrero 28, Biyernes, ang lig-ong Philipinne Air Lines, nanghatag og pink slip sa naapektohang 300 ka empleyado aron kini papirmahan, diin 200 kanila ang gitaktak ug 100 ang naahat pagpayil og early retirement bisag sakit kaayo kini sa ilang buot.

Usab, may airlines company nga miawhag sa ilang 27,000 ka kawani nga mopayil og tulo ka semanang voluntary forced leave without pay sulod sa bulan sa Marso hangtod Hunyo ning tuiga sanglit migamay man ang kita sa ilang kompaniya human sa subsob nga pagkanselar sa daghang international flights. Kay kon dili nila kini madiskartehan og husto, basig masira! Pero, tayim sa! May igo kahang pundo ang mga apektadong empleyado nga sarang ikagasto sa inadlawng panginhanglanon sa ilang pamilya? Dili kaha magutman ang mga anak nga nagtungha ug unya may masuso pa?

Dugay rang nag-antos ang Pilipinas sa unemployment problem. Unya sa Covid-19, gitiwasan pa? Asa na man lang paingon ang nawad-ag trabaho nga seguradong mapun-an pag laing daghan kon si Covid-19 dili gyod mamatay ug magpadayon sa pagpanakod?  Dili kay gitakdan ug gipamatay lang ni Covid-19 ang katawhan. Gikuhaan pa gyog trabaho. Paita! Lenten season na. Panahon sa pagpamalandong nganong gipadad-an ta sa Ginoog kagaw nga hangtod sa pagsulat niini, wala pa gyod masakpi ang tukmang tambal? Oo, panahon na nga makig-istorya-reconcile ta Kaniya sulod sa simbahan. Buwahan, ang Iyang isulti nga wala mabati sa uban, atong madungog.