EDITORYAL - Sa mata sa mga bata

Maayo kining gihimo sa Police Regional Office-7 ug sa lokal nga pangamhanan sa dakbayan sa Talisay sa pagpaduol sa katawhan ilabi na sa Barangay Tanke samtang gipangusgan ang kampanya batok ilegal nga drugas.

Ang pamunoan ni Police Brigadier General Albert Ignatius Ferro ug ni Mayor Gerald Anthony “Samsam” Gullas Jr. nilusad og cleanup drive sa baybayon sa maong barangay ug pormal nga gihatag ngadto sa mga molupyo ang mga pangpublikong pansayan.

Ang ingon niini ka simpleng mga serbisyo publiko maoy gipangita sa katawhan gikan sa ilang mga lider. Pinaagi sab niini, mas mapaduol pa ang kapolisan ug ang mga lokal nga mga opisyales ngadto sa mga molupyo.

Bisan sa mga simpleng serbisyo dako kaayo ang natabang sa maong programa para sa mga taga Tanke.

Dili na sila kinahanglang modagan sa baybayon kun mopagawas sa ilang hugaw tungod kay peligro kaayo kini alang sa mga molupyo nga magkasakit.

Maayo unta og dili lang ang Barangay Tanke ang matabangan niining maong programa, kay bisan limitado ang pondo sa PRO-7 para sa mga ingon niini kadako nga proyekto, mahimo man silang makigalayon sa mga LGUs ug non-governmental organizations.

Ang maong simpleng programa sa kapolisan ug sa LGU makahatag og positibong pagtan-aw sa mata sa publiko ilabi na sa kabataan.

Tungod kay gidungog man kaniadto pa nga naghitak sa ilegal nga drugas ang barangay Tanke, dili layo nga ang kabataan didto makadungog lang bahin sa mga polis kun dunay pangdakpon diha sa ilang barangay nga nalambigit sa ilegal nga drugas.

Basin ang uban kanila may kahadlok na sa mga otoridad tungod sab sa pagpanghadlok sa mga ilegalistang naglihok kaniadto sa maong barangay.

Ug tungod kay pulos ra man police anti-criminality operations ang makita sa mga kabataan didto, limitado sab  ang nahibaw-an sa mga kabataan kabahin sa papel sa mga polis.

Ang mga bata dali rang makatimaan ug maestoryahan mao nga kinahanglan makita nila ang mas maayong pikas bahin sa mga polis ug sa gobiyerno.