EDITORYAL - Way papel ang tunghaan sa fraternities?

Usa sa mga dili makitawhanong kultura sa mga fraternities ug sororities kining hazing. Ang hazing usa ka pisikal nga pagpanakit sa mga bag-ong rekrut nga miyembro aron masukod ang ilang ‘loyalty.’

Apan mao kini ang hinungdan nga dunay mga rekrut nga nangamatay tungod sa grabeng bun-og. Ang uban giingong aksidente lang apan dunay uban nga ang nalambigit nga miyembro dunay dakong kalagot sa bag-ong rekrut.

Ang Pilipinas adunay Anti-Hazing Law nga giamendahan dayon human daghan gihapong nangamatay ug nahimo na karong Republic Act 11053 o Anti-Hazing Act of 2018. Sa RA 11053 giisip na nga usa ka matang sa hazing ang ‘psychological suffering’ sa mga rekrut. Salag sa mga fraternities ang mga tunghaan kay mismo pa ang mga kadagkoan sa mga unibersidad miyembro niini sa dihang nagtungha pa sab sila.

Sila maoy nahimong tigtagmbag sa mga estudyante nilang miyembro, apan nunot sa mga insidente sa hazing dunay mga tunghaan nga nag-ban kanila sa mga campus. Apan husto ba nga i-ban sila sa mga tunghaan?

Sama ra man ni og gipiringan lang sa mga opisyales ang ilang mga mata ug nanabon sa ilang mga dunggan. Kay naa man gihapon kining mga fraternities sa ilang tunghaan. Nangangkon sila nga wala nila gitugot ang mga fraternities diha sa ilang institusyon, apan dako kining bakak. Pagkatinuod, nanagana lang silang daan nga kun dunay dautang mahitabo makapanghunaw ra sila. Sa laktod, naglikay sila og responsibilidad tungod kay wala silay panahon aron giyahan kining maong mga organisasyon.  Ang fraternities ug sororities dunay mga maayong tumong, apan tungod sa kabatan-on ug kakuwang sa giya, diha dunay mga dili maayong hitabo.

Husto si Pres. Duterte sa pag-ingon, dili gyud kalikayan nga dunay mga hazing sa mga fraternities, apan wa magpasabot nga di na kini mapugngan.

Ang ikaduhang semana sa Pebrero giproklamar ni Duterte nga “National Hazing Prevention Week” ug gipahimug-atan niya ang state policy nga maghatag og bili sa dignidad ug respetuhon ang tawhanong katungod sa tawo.