Mas paspas ang kagaw sa kahadlok
Mas paspas kay sa Wuhan coronavirus ang pagkatap sa kagaw sa kahadlok. Nga kun paundayonan mahimong mosangpot sa paghimo og mga lakang nga mas makapasamot inay makatabang sa pagsulbad sa krisis (ang mga gobyerno motak-op sa ilang mga utlanan nga labing makahasol sa mga panginabuhi ug patigayon ug ang katawhan mabuak-buak pinasikad sa bulok sa ilang panit ug mga nasud nga ilang gigikanan).
May sukaranan ang mga pahimatngon nga ang pataka ug iyahay ug pinatuyangan nga mga panagang sa gikabalak-ang kadaot sa kalibotanong pagkatap sa bag-ong kagaw mosangpot sa mas dakong kadaot, ang posibleng paghagsa sa ekonomiya ug panag-unay inay pagtinabangay sa mga nasud ug katawhan.
* * *
Gitumbok sa mga eksperto ang lima ka hinungdan sa pagburot sa kahadlok sa Wuhan coronavirus:
• Una, makamatay ang kagaw;
• Ikaduha, di makita ug busa lisod nga sagangon;
• Ikatulo, mahimong matakdan bisan naghimo lang sa inadlawng gimbuhaton;
• Ikaupat, wa pay klaro makontrolar ba sa China ug ubang kanasuran; ug
• Ikalima, mas paspas ang pagkatap sa sayop nga kasayuran tungod sa social media.
* * *
Duna hinuoy mas dagkong sukaranan sa pagsalig nga mas daling masulbad ang Wuhan coronavirus kay sa nangaging mga epidemiya:
• Una, mas daling nailhan, sud lang sa usa ka semana (wa ni mahimo sukad) na-sequence sa mga siyentipiko sa China ang genome sa kagaw ug gipakisaw-an sa sa tibuok kalibotan pinaagi sa internet ug busa mas daling kapangitaan og panagang;
• Ikaduha, ang bag-ong mga teknolohiya sukad nakaplagan ang coronaviruses sa 1960s nihimong mas takos sa mga laboratoryo sa pagpalawom sa mga pagtuon nganong nangambak gikan sa kahayupan ngadto sa katawhan (pananglitan, hagbay rang coronaviruses nga nisangpot sa yanong sip-on apan ang SARS maoy nakabutyag nga ang kagaw gikan sa mga hayop);
* * *
• Ikatulo, mas dakong kahigayonan nga taga gawas sa China matakdan sa kasarangang flu kay sa Wuhan coronavirus ug busa ang paglambo sa naandan nilang panagang sa pagpanghunaw ug di paghikap sa nawong mopatidlom sa mga kaso sa naandang flu karong tuiga; ug
• Ikaupat, makahahadlok tan-awon ang labing bag-ong mga numero sa Wuhan coronavirus nga 213 ang namatay ug 8,100 ang natakdan hangtod nga mapasabot nga mas daghan ang naluwas ug nakagawas na sa tambalanan.
* * *
- Latest
