Awhagon nako pagbalik ang kadagkoan sa MCWD nga susihon unta nila kon nganong human sa Pasko, wala na man sab moagas ang mga gripo sa mga lumolupyo nga namuyo duol sa Busay Barangay Hall.
Akong klarohon nga ang Busay Barangay Hall anaa ra mahimutang unahan og gamay sa Marco Polo Hotel, ug ang gitukoran niini sakop pa sa Barangay Apas. Gipasabot nako ni kay basin og moingon ang taga MCWD nga walay agas sa maong lugar kay bukid na kaayo ang Busay.
Ang mga amigo nako nga kawani sa MCWD nga maoy nagdumala sa booster pump duol sa Camp Lapu-Lapu, miingon man nga kusog ang pressure sa tubig nga gibuga paingon sa booster pump nga nahimutang atubangan sa Marco Polo Hotel.
Ang tubig nga moabot sa booster pump sa may Marco Polo, ibuga na usab sa booster pump aron moabot kini sa kabalayan.
Mao nga nahibulong ko nga siyaro, bisan tinulo na lang sa tubig wala gyud?
Akong awhagon si Engr. Diola sa MCWD nga iyang susihon kay nagtuo gyud ko nga gisirad-an ang linya sa tubig nga paingon sa may Busay Barangay Hall ug mao nga daghan ang nag-antos nga walay tubig.
Palihug kuno sir, kay makapaduda na gyud kaayo. Siyaro, bisan tinulo na lang walay moabot sa mga gripo?
Usbon nako, makapahibulong na gyud kaayo nga way agas-agas ang mga gripo sa kabalayan nga unta kanunay man nga nagbuga og tubig gikan sa ubos.
* * *
Matud ni Raquel Arce, ang commander sa PROBE Team sa City Hall, nga may rekomendasyon na kuno siya nga panggub-on ang mga estraktura nga gipangtukod sa aseras diha sa Taboan District.
Nagpaabot na lang kuno siya nga aprobahan sa mayor ug hatagan siya og kamandoan nga panggub-on ang kabahin sa kabalayan nga gitukod sa mga aseras diha sa Lakandula Street, sa Tres de Abril, B. Aranas, Tomas Abella Street ug uban pa.
Ang ako lang nga kon igo lang ta nga magpaabot, basin og mataligam-an na lang kadtong maong mga rekomendasyon, kon duna may rekomendasyon.
Ang gipasabot nako nga kinahanglang himoan gyud og makanunayong follow-up.
Makabantay tingali kamo nga mora ko og plakang buak nga nagbalik-balik niining mao nga isyu, kabahin sa pag-ukopar sa mga aseras nianang mga mapahimuslanon sa higayon.
Nasayod ko nga daghan ang mangasuko niining akong gihimo.
Ang unang masuko mao ang mga hakog og lugar nga hasta ang aseras himoong kabahin sa ilang balay, ug ang laing masuko mao si ma’am Raquel Arce kay daw gipugos man sila aron gyud molihok sa ilang katungdanan.