Holy Land

Salamat sa mga tawong manggihatagon kaayo nga sa dakong grasya mibuot ug mitugot nga ako makakuyog sa mahitabong pilgrimage holy land karong  Holy Land karong Pebrero puhon kun paabuton.

Kining maong panaw mahimong kahigayonan alang kanako sa pagtaak ug pagsaksi sa unang higayon sa mga dapit nga gibaktasan ug giwalihan sa atong Ginoong Jesus panahon sa iyang Public Ministry mga P2 mil na ka mga katuigan kapin ang nilabay.

Sa akong pagtungha kaniadto sa Christology dunay duha ka mga matang sa Christologies. Ang Christology from Below ug Christology from Above. Ang Christology from below nagtudlo nga dunay Historical Jesus nga misuroy ug nanudlo. Gani natawag siya og the Itinerant Preacher tungod kay most of the time siya nagpanaw man.

Ang Christology from above nagtudlo nga si Jesus ni exist before pa sa tawhanong panahon. Kini nagpasabot lamang nga siya anaa pa bisan wala pa ang panahon.

Ang pilgrimage kasinatian man sa pagtuo. Ang maong pilgrimage nagpahinumdom kanato nga ang atong gisimba ug giampoan dili man Dios sa hunahuna lamang kondili Dios siya nga mas suod sa tawhanong kasinatian. Kining maong kasinatian alang kanako personally kasinatian man sa grasya.

Niadtong nianhi si Pope Francis sa Pilipinas wa ko magdahum nga gipadala ako sa atong Archdiocese ingon nga kabahin sa Cebu Delegation alang sa maong kasaulogan. Sulagma usab kaayo nga sa akong kinabuhi ingon nga binunyagan tulo ka mga santo papa ang akong naagian.

Niadtong nahimugso ko mao pud ang pagkapili ni Papa Juan Pablo Segundo, sa dihang padulong ko gradwar sa Telohiya si Papa Benedicto ang nipuli ug gani nakaabot pa gyud ko ni Papa Francisco. Mga kasinatian kini nga dili sulagma lamang alang kanako kondili kasinatian gyud sa grasya nga angayang pasalamatan sa hilabihan.

Sa akong unyang pag-adto didto akong dad-on ang inyong mga pag-ampo ug langkubon ko kini adlaw adlaw sa akong kinabuhi. Ug kun may mga pasalubong man akong dad-on kana mao ang relihiyusong kasinatian nga dili lang personal kondili pinasikad usab sa bisan unsang gitudlo sa Balaang Kasulatan.

Salamat kang Padre Dondon ug Melo akong mga magtutudlo kanako kaniadto sa seminaryo kay ang ilang pagtudlo nakatabang kanako nga makabaton og kaikag sa pagtaak sa dapit diin nipanaw ang atong Ginoo! Kay matud pang San Geronimo, Ignorance of Scriptures is Ignorance of Christ.

Hinuon niadtong bata pa ako akong nahinumdoman ang gitudlo sa among katekista kalabot sa Balaang Kasulatan. Ang maong awit nagkanayon: “Magbasa ta sa  Bibliya, sa Bibliya, sa Bibliya. Magbasa ta sa Bibliya aron motubo ta! Aron motubo ta! Aron motubo ta! Magbasa ta sa Bibliya aron motubo ta! Ning maong pilgrimage padulong sa Balaang Yuta usa pud ka kasinatian sa pagbasa sa Balaang Kasulatan sa mas visual nga paagi.

Dili naman tuod mahimong mahisama pa kini sa kaniadto apan tingali ato pang matagamtaman ang atong Ginoo nga mihikap gyud kanato sa paaging suod ug mahigugmaon. Walking is therapy matud pa nila ug unta sa akong paglakaw didto maalim pud ang akong mga espirituhanong mga samad.