Usa sa mga ikapasigarbo sa mga Sugboanon kining debosyon ngadto sa Balaang Bata, ang Senyor Sto. Niño kansang pangilin saulogon matag ikatulong Domingo sa bulan sa Enero kada tuig.
Ang pangilin gipanindot pa gyud pinaagi sa mga kalingawan ug pasundayag nga gipasiugdahan sa lokal nga kagamhanan sa siyudad ug pag-abag sab sa lalawigan ingon man sa mga silingang lungsod.
Ang maong kalingawan mao ang Sinulog. Sikat kaayo nga kalingawan dungan sa pista. Sumala pa nga kulturahanon kaayo ang tumong niini pinaagi sa pagsayaw sa halad sa mga deboto ngadto sa Balaang Bata.
Dungan sa pagsayaw-halad ang pagsangpit nga puno sa pagdayeg ug kalipay sama sa kinaiya sa usa ka batang malipayon.
Dinhi sa Dakbayan sa Sugbo ug bisan sa ubang mga lugar sa lalawigan, daghang mga bata ang nakasuway na sa pagsalmot pagsayaw sa Sinulog.
Sa mismong adlaw na sa pista, himuon sab ang Sinulog Grand Parade nga diin dili lang mga taga Sugbo ang mosalida, moapil sab sa parada ang mga out of town contingents.
Makigtigi sila sa ubang mga contingents gikan sa panindotay pagsayaw diha sa karsada, presentasyon diha sa entablado ug panindotay sab og costumes.
Apil sab sa parada ang nagkadaiyang mga floats gikan sa mga dagkong kompanya ug mga organisasyon ug uban pa.
Tinuod nga nahimo nang komersyal ang maong kalihokan apan dili naman gyud kini kalikayan tungod kay ang tanang buluhaton sa pista ug sa kalingawan nagkinahanglan og kwarta.
Makita man sab ang paglambo sa mga presentasyon diha sa simbahan ug sa indigay sa mga contingents.
Ug dili kamahayan tungod kay sa samang higayon napreserbar man ang debosyon sa mga tawo ug gani mas giganahan pa ang uban tungod kay human sa ilang pagtuman sa panaad isip mga deboto, malingaw sab sila sa mga kalingawan.
Bahala na og unsay ikasulti sa uban , basta ang mahinungdanon kung unsay naa sa kasingkasing sa tawong manganhi pagdebosyon sa Senyor Sto. Niño.