EDITORYAL - Pista Senyor ug ang Sinulog

Mabatyagan na ang gitawag nga Sinulog fever dinhi sa Sugbo, sentro niini ang Cebu City kay dinhi nahimutang ang Basilica Minore del Sto. Niño, pinuy-anan sa imahen sa Senyor Sto. Niño nga gimahal dili lang sa mga Sugboanon kondili sa mga tumutuo sa relihiyong Romano Katoliko sa kalibutan.

Makita diha sa kadalanan ang mga nagkalainlaing mga baligyang memorabilia sa Sinulog, mga t-shirts, mga kawo, payong, bags, scarf, ug daghan pang uban nga magpahinumdom sa Sinulog dinhi sa Sugbo.

Naglanog-lanog ang mga soundsystems sa nagkadaiyang mga establisamento nga nagpabalik-balik og tukar sa Batubalani sa Gugma ug ang “Pit Senyor!” ug daghan pang mga awit pahinungod ug pagdayeg sa Balaang Bata. Apan pagkatinuod, dili tanang dumuduong dinhi ang kapistahan maoy tuyo kondili ang kalingawan ug ang komersyo. Wala ug tuo ang mga parties, kalingawan, ug uban pang mga gimmicks, sa laktod kiat-kiat.

Nakalimtan ba lang kaha ang tumong sa maong selebrasyon nga mao ang Senyor Sto. Niño o wala gyuy apil sa ilang tuyo sa paganhi ang pagsimba o pagdagkot o magpa-Sinulog diha sa manindahay og mga kandila sa atubangan sa Basilica.

Sa estorya pa, di ka katuohang nakabisita sa Siyudad sa Sugbo kun wala kay litrato nga nakasimba o nakapa-Sinulog ka sa basilica pakapin nalang sab ang pagpahulagway sa Magellan’s Cross sa kilid niini.

Apan bisan unsa pa ilang tumong sa paganhi atol sa kapistahan, respetuhon unta nila ang uban nga ang debosyon maoy ilang tuyo pagsakripisyo sa paganhi sa Sugbu. Kaning uban nga dumuduong nga dili ang Senyor Sto. Niño ang tumong, dili lang unta magmugna og kasamok ug makaguba sa ka solemni sa kasaulogan sa paghalad. Angay masayran sa mga dumuduong nga dili ang Sinulog maoy sentro sa selebrasyon karong Enero 19 kondili ang pista sa Senyor Sto. Niño.

Kung dili pa sa Balaang Bata walay Sinulog kay ang nauwahi halad para sa nahauna.

Mao nga labing maayong unahon ang sakripisyo pagsimba uwahi na ang kalingawan atol sa maong adlaw.