Gipahibawo na sa buhatan ni Presidente Rodrigo Duterte ang iyang mga suod dinhi sa Sugbo nga motambong siya sa Sinulog Grand Parade karong Dominggo, Enero 19.
Gipaandam silang daan sa pag-abi-abi sa presidente human sa iyang pakighimamat sa mga manan-aw sa parada sud sa Cebu City Sports Center (CCSC).
Angayng mangandam na sang daan ang mga mamalit og tiket sa CCSC sa mas hugot nga seguridad sa ilang pagsud.
Mahimong did-an sila sa pagda og dagko nga mga bagahe ug higpitan pag-ayo ang ilang mga lihok sa sud sa CCSC.
* * *
Kon mahinayon ang pagtambong sa presidente, gipaabot nga bahaan sab ang Sinulog sa labing dagko nga mga politiko ug labing adunahan nga mga negosyante di lang sa Sugbo ug Kabisay-an kon dili apil nang taga Luzon ug Mindanao.
Kay kasinatian sa niaging kapin sa tulo ka tuig sa kasagaran nila, labi na sa mga may mga kaso ug ubang mga eskandalo nga giatubang ug may gipangayo nga dagkong pabor sa nag-ung-ong nila nga mga transaksiyon sa nagkalainlaing buhatan sa gobyerno, nga mas gawasnon silang makaduol sa presidente gawas sa Malakanyang.
* * *
Kay mas dako man ang kahigayonan nga pawungon na sab ang signal sa mobile phones kon motambong ang presidente sa iyang labing unang Sinulog, mas maayong mangandam na tang daan og alternatibo nga mga paagi sa komunikasyon.
Hinaut wa pa kang makalimot sa karaang paagi sa komunikasyon nga gitawag og landlines: Ilistang daan ang landlines sa kapolisan, kabomberohan, barangay halls ug mga tambalanan ug sabotang daan ang mga silingan nga duna pay landlines aron may katawgan kon simbako may mga dinalian.
* * *
Bisan Piyesta Senyor, ayaw patuyang og pangimbitar sa imong mga paryente ug mga higala gikan sa ubang dapit aron patilawon sa labing lamiang mga kan-anan ug imnanan sa Sugbo. Kay samtang pawong ang cell sites mahimong di mapuslan ang credit cards bisan sa gawas sa Cebu City.
Mas maayong adto manuroy sa mga dapit nga duol sa automated teller machines (susihang daan nasumpay ba sa landlines ug wa magsalig sa cell sites) aron di mahasol pagpangita og ikabayad. Kay kon magda og daghang cash, ampay sab sa mga mamistahay nga balhibuon og kamot.
* * *