Pope Francis tawo lamang

In every action, there is a reaction. Ang kahoy nga walay mata, walay baba, walay tiil ug walay kamot, mobalos man gani ngadto sa nagbugha, unsa na kaha ang tawo nga adunay kasingkasing nga mobati og sakit panahon nga siya kusion, sumbagon o bunloton?

Ako lang mismo, dinhay higayon nga dihang mikalawat ko sa Redemptorist Church, nakurat ko sa paring langyaw nga nagpakalawat kay bisag giabli na nako akong baba, wala gihapon niya ihungit ang ostiya nga iya nang gigunitan, nga unta pag-ingon niya og: “Body of Christ” mitubag na man kog “Amen.”

Niadto mismong aktoha, gisakitan ko kaayo sa iyang gibuhat. Tingale, wala siya masayod nga alang nako gipakabalaan kog maayo ang sagradong pormas nga giisip kong Lawas ni Kristo.  Busa, di ko gustong mabulingan kini sa akong palad.

Ingon ini ang pag-ila ko sa kabalaan sa ostiya. Gani, bisag gitugotan na sa simbahan ang mangalawat nga mao na mismoy mohungit-kaon sa ostiya nga gibutang sa pari sa ilang palad, maoy akong prayoridad nga pari gyoy mohungit Niini sa akong baba.

Nakasabot ko nganong wala gyod ko hungiti sa maong pari. Tingale, nahadlok siya nga may sakit ko. Nahadlok nga basig matakdan siya ug ang tanan niyang pakalawaton.

Hinuon, gipugngan ko ang pagbuto sa akong kahiubos. Ug maoy gipili ang tumang pagpaubos.

Sama sa nahitabo ni Pope Francis sa miaging Bag-ong Tuig. Sa wala pa magsugod ang misa, Pag-agi niya sa daghang magtutuo, may babayeng mibunlot niya, diin hapit siya malamba. Makita sa iyang nawong ang kasuko nga gidunganan sa iyang pagpilpil sa kamot sa babaye. Talan-awon nga mianig minilyong reaksiyon.

Sa social media, mipabaha ang lainlaing komentariyo. May milaban. Adunay mikontra. Ang nakanindot ni Pope Francis, kay dihang milurang na ang makusog unos sa iyang kahuyang ug gipulihan sa langitnong kahimatngon, ang kadali ra niyang nakapangayog pasaylo ngadto sa babaye panahon sa iyang homiliya.

Sa kataas sa iyang nahimutangan, wala siya magpanuko sa pagpaubos aron lamang mangayog pasaylo sa anaa sa iyang ubos.

Sa katawhang misaway ni Pope Francis, hinumdomi: ‘nga sama nato, siya tawo ra usab. Ug kay tawo lamang, usahay madakin-as pod ning danglog kaayong kalibotan nga atong gilaktan.’