Nagbunga na maayo ang gipatumang hugot nga regulasyon sa pagpamaligya og mga pabuto base sa gidaghanon sa mga firecracker related injuries nga natala sa nakalabay nga selebrasyon sa Pasko ug pagsugat sa Bag-ong Tuig.
Apan apil unta sa ikonsiderar kun nganong idili na gyud unta ang pagpamaligya og mga pabuto mao ang mga binuhing mga hayop o pets diha sa mga panimalay.
Ang mga iro, iring, ug uban pang house pets nahimo kabahin na sa mga pamilyang mahigugmaon kanila. Apan wala sila makasabot unsa ang Pasko ug Bag-ong Tuig ug kun unsa ang gipangbuhat sa ilang mga agalon ug sa uban.
Sensitibo og pangdungog ang mga mananap, mao ni nakalahi kanila itandi sa tawo. Busa, hunahunaa nalang kun ang tawo susama pa ka sensitibo og pangdungog sama sa iro ug iring, unya dunay magpabuto diha sa ilang tungod.
Sa pagkakaron, ang tawo maoy sentro sa paningkamot sa Department of Health ug sa gobiyerno sa pag-regulate aning pagbaligya ug paggamit og pabuto.
Base sa pasiunang impormasyon nga gipagawas sa DOH, 164 ka kaso lang ang mga nabuthan gikan sa 50 ka mga tambalanan sa tibuok nasud nga ilang gibantayan itandi sa 251 ka mga kaso sa miaging 2018, 35 posiyento ang pagkubos niini.
Nimenus sab ang mga insidente sa indiscriminate firing ug biktima sa saag nga bala nga usa sa mga hinungdan sa pagkamatay sa tawo panahon sa selebrasyon.
Ang surveillance sa DOH ginahimo sugod Disyembre 21, hangtud Enero 1 pagkasunod tuig.
Kun tinud-on lang gyud diay sa gobiyerno ug sa mga ahente niining tigpatuman sa balaod ug mga regulasyon dili diay lisud pasundon ang mga Pilipino.
Sukad nga gipahugtan ang regulasyon naanad nalang sab ang publiko nga di makadungog og sipang buto sa ilang palibot samtang nagsingabot pa ang selebrasyon.
Gani, duna gyuy dili na ganahan ug mamadlong na magpabuto ilabi na mga bata kay silay kuryosong magpabuto.
Kun tingali i-konsiderar sab ang kaayohan sa atong mga mananap, mas luwas ug mabulokon ang maong kasaulogan para sa tanan.