Sunodsunod ang mga katalagman nga mihasmag sa nagkalainlaing dapit sa Pilipinas. Lunop. Sunog. Linog. Bagyo. Magpulipuli lang.
Liboan ka panimalay ang nawad-ag kapuy-an. Gatosan ka kinabuhi ang nakalas.
Ug mas daghan ang nangaangol, walay labot sa mga biktima nga gianod sa makusog sulog ug gitabonan sa nangliki-nangatumpag nga yuta.
Sagad sa mga balay nga mangatun-as human wataswatasa sa mapintas nga gumonhap, ang iyaha gayod sa mga kabos nga hinimo lamang sa mga baratohong materyales, diin ang mga haligi igo lang gilubong sa humok bas duol sa baybayon ug lipak ray gihimong kabilya sa mga bungbong nga ang mga hollow blocks wala pa matarong pagsemento, timaan sa kakulang sa salapi nga ikapadayon sa paghuman.
May mga kabos nga mag-atang sa trak sa basurahan nga mohuwad sa nakolektang basura gikan sa nagkalainlaing food chain sa dakbyan. Maglumbaanay pag-ukay sa bag-ong nadiskargang laundok, namasin nga makabangal og mga biyang pagkaon nga giusik-usikan lang sa mga adunahan apan ilang gipakabulawan.
Pinuy-anan? Kutob ra sa barongbarong ang ilang mahigdaan.
Barongbarong nga ang atop, salog, ug bungbong pulos tinapakan.
Ingon niini ang matang sa kapait nga ilang gipuy-an. Ang matang sa krus nga ilang gipas-an.
Ang mga mangingisda, mag-uuma ug ubang pobreng mamumuo kang kansang mga balay gigun-ob sa bagyong Ursula, igo na lang sa pagngaab samtang nagsud-ong sa nahapla nilang tigbayon nga dili na mapuslan.
Senariyong naglarawan sa laing matang sa krus nga ilang gisagubang.
Unang adlaw sa Bag-ong Tuig 2020, sugdan na ang pagtaas-patong sa ikatulo ug kataposang excise tax ngadto sa tanang produkto sa lana: P1 sa gasolina, P1.50 sa krudo ug P1 sa kerosene matag litro.
Gumikan niini, motaas sab ang presyo sa gasolina. Ug inig taas, maglumba pagsaka ang bili sa tanang palaliton, diin ang magbaguod sa kabug-at mao gihapon ang mga kabos nga wala pa gani makaginhawa human lumsi sa bagyong Ursula, dakdakan na usab sa mapintas domino effect sa nahisgotang fuel excise tax.
Pagkadako sa krus nga misugat nato sa Bag-ong Tuig.
Mas maayo pang krus nga hinatag sa Ginoo kay gaan. Pero kining krus nga binuhat sa gobiyerno, haskang bug-ata.
Kanus-a kaha ni sila makahimog balaod nga makadato sa kabos, no?