Walay katagbawan ang tawo

Gidepensahan ni Speaker Alan Peter Cayetano ang P150 mil nga bonus nga gihatag ngadto sa mga empleyado sa buhatan sa Ubos Balay Balaoran.  Matud pa sa kongresista, ang dakong bonus makapalikay sa mga empleyado sa mga tentasyon sa korapsyon. Apan gikataho usab nga mireklamo ang ubang empleyado kay gibuhisan pa man ang ilang bonus. Daw sama sila sa sugilanon sa usa ka bata nga nagpunay’g hilak kay nahulog ang iyang 50 sentabos sa imburnal.  Sa dihang gihatagan siya ug 2 pesos aron unta mohilom, misamot na man hinoon paghilak ang bata kay matud pa niya, “Kon wala pa mahulog ang akong 50 sentabos, 2.50 na unta akong kwarta”.  Way katagbawan ang tawo. Saoonz!

Nag-bonding  tungod sa bagyo

Tungod sa bagyo’ng Ursula nga mikuso-kuso sa Tungang Kabisay-an atol sa bisperas sa Pasko, daghan ang mga pasahero nga natanggong ug wala makapauli sa tagsa-tagsa nila ka destinasyon.  Daghan ang dismayado kay wala nila makauban ang mga mahal sa kinabuhi atol sa Pasko. Apan labaw nadismaya ang uban nga mahiligon sa kalingawan kay wala sila makalaag tungod sa dauta’ng panahon.  Adunay lahi nga paagi ang kinaiyahan sa pagselebrar sa Pasko nga wa mahaum sa gusto sa kadaghanan. Napugos pag-bonding ang mga kabanay inay mag-iyahay ug laag atol sa bisperas sa Pasko.  Dili diay tanan dautan ang epekto sa bagyo. Payts ra!

Love is blind

Ang managtiayon nga si Hernante ug Amanda (dili nila tinuod nga ngalan), pulos mga detenido, mipahimulos sa libreng kasal nga gipahigayon sa Mandaue City Jail.  Si Mayor Jonas Cortes mismo ang mikasal kanila. Matud pa ni Amanda, nakat-on siya paghigugma kang Hernante tungod kay siya lambing ug maayong tawo; samtang si Hernante nagkanayon nga nahigugma usab siya kang Amanda kay motuman gayud kini sa iyang mga tambag. Wala hibaw-i kon apil ba sa tambag ni Hernante nga mohimo si Amanda og salaod mao nga sila’ng duha karon ang nagtingkagol sa bilanggoan.  Buta ang gugma!

Moinom gani ang manok

Nasuta sa Food and Drugs Administration human nila ma-examine ang pipila ka sample sa lambanog nga aduna diay sambog nga “methanol” ang maong mga ilimnon nga maoy hinungdan sa kamatayon sa pipila ka binuhat ug nakahilo usab sa sobra 300 ka tawo didto sa lalawigan sa Rizal ug Laguna. Pastilan ang tawo, mahitumpawak lang tungod sa pagka-abusado, moinom gihapon bisan makahilo.  Kay lage matud pa sa pagya, “Moinom man gani ang manok bisan di kahibalo mangihi, tawo pa kaha!”  Saoonz!