EDITORYAL - Malipayong Pasko sa tanan

Subling magkatapok-tapok ang kadaghanan sa mga pamilyang Pilipino karong gabii alang sa tradisyon pagsugat sa Pasko nga kompleto ang pamilya sama sa Balaang Pamilya pahinungod sa pagkatawo sa Manluluwas.

Sa mga miyembro sa pamilyang atoa sa layo ug walay kahigayonang ikauban ilang mga pamilya, dunay cellphone o internet nga mahimong gamiton aron magkakumustahay sa mga kadugo.

Bisan wala ilang pisikal nga presensya, mahimo gihapon silang ikasalo pinaagi niining modenong teknolohiya. Sama sa naandan, anaa gyuy mga salusalo dili lang sa managkadugo kondili hasta sab kauban sa mga silingan ug kahigalaan ning panahona.

Uban sa salo-salo ang inom ug pagkaon og hilabihan ka mantikaon ug tam-is nga daan ng gipahimangno sa Department of Health nga angay hinayhinayan ilabi na niadtong may mga gihambing balatian tungod sa dili maayong diyeta.

Kinahanglan sab magbantay ang tanan ilabi na ang mga ginikanan niining mga magpabuto tungod kay dili matagna ang panahon basin unya og dunay mabuthan tungod sa paturagas nga pagpabuto.

Sa pagsulod palang sa kapaskohan, namatikdan ang grabeng pagkubos sa gidaghanon sa madungog nga mga pabuto. Natural menus sab ang kahigayonang dunay mabuthan.

Apan mas siguradong luwas ang pagsugat sa Pasko kun wala na gyuy magpabuto ug magpasalba og armas nga makapagan sa mga inosente.

Dako og papel ang mga barangay officials pagbuhat niini, kinahanglang dili sila mohunong sa pagpatrolya ug pagpahimangno sa mga tawo kabahin sa peligro sa pabuto.

Dili lang mga tudlo o kamot ang posibleng mawala kun mabuthan tungod kay hinungdan sab kini sa mga sunog.

Sa pagsugat sa Pasko karong gabii, angay ibutang sa hunahuna sa tawo ang diwa niini. Dungan sa pagbalaan sa maong adlaw ang pag-amping sa tanang oras ug dili makalimot kun unsay katuyoan nga nagsaulog og Pasko ang tanan. Gikan dinhi sa Banat News, maayong Pasko kanatong tanan!