Kasagaran basta buwan gani sa Disyembre, mag-ambahan gayud kita sa pagpanaygon. Gikan sa mga organized caroling o caroling for a cause ato mang gihimo matag Christmas Season. Bisan gani ang mga batan-on, bata ug kitang mga dagko ang nahimong nagbansay niini. Gitara, kutsara ug uban pang magamit nga tulunggon atong pagahimoon makasing-al lang gyud alang niini. Bisan pa man kun kini nagkahulogan og paggukod sa mga iro nga gisabaan sa tingog natong yabag.
Dinhi sa Madridejos, Alegria nahimong busy kaayo kaming mga tawo diha sa among pagpahigayon og ampo daygon. Akong gituyo nga magkuyog gyud ang tanang mga grupo aron sa ingon mamahimong mausa lamang ang kalihokan ug mamahimong visible ang presensiya sa parokya ngadto sa mga parokyano.
Ang pamaagi mao nga dunay pasiunang awit dayon pagasundan kini og pagbasa sa Balaang Kasulatan ingon man ang pag-ampo sa panalangin alang sa panimalay. Dayon pagasundan kini og pagbendita sa balay ingon man sa mga pumupuyo niini samtang awiton ang kasadya.
Sa ingon nga paagi, mas masabtan nga ang daygon diay dili lang pagpangayo kay dunay panginahanglan ang parokya kondili ang pagpanaygon diay usa ka pagpadangat sa mensahe sa kalinaw ngadto sa tagsa tagasa ka mga panimalay. Matag gabii dunay panihapon nga gitagana ang pipila ka mga parokyano nga manggihatagon kaayo.
Dunay pipila ka mga punto sa pamalandong nga atong makutlo niini. Kini naglambigit ning mosunod:
1. Ang tanan gidapit aron magpuyo sa kinabuhi ingon nga mga ebanghelyo ngadto sa ilang isig kaingon. Ang pagka ebanghelyo nagpasabot man og pagdala sa mensahe sa gugma ug kalinaw ngadto sa uban.
2. Ang pagpanalangin sa matag balay buhat gyud sa simbahan busa angay ug matarong lamang nga ipaambit kini sa tumang kamadagayaon.
3. Ug labaw sa tanan ang pasko sa Pagkatawo sa Ginoo kahigayonan sa pag-ambit sa kalipay nga hilabahan nga angayan natong saw-an isip mga katawhan sa Dios nga iyang gikahimut-an.
Maayong Pasko kanatong tanan! Bisan pa man kun malisud ang panahon apan padayon gihapon kita sa pagpasalamat niini kay ka usa ra gyud mahitabo ang Pasko sa usa ka tuig bisan pa man kun himoon nato ang matag adlaw ingon nga kasaulogan sa Pasko!