Tinghatagay rong panahona og Christmas gifts gikan sa mga dagkong kompaniya ngadto sa mga empleyado. Pero dili tanang empleyado makadawat. Ilabi nga ang tag-iya nga gihatagag prangkisa sa gobiyerno sa pag-operate, foreign investor.
May mga empleyado sa gobiyerno nga kinasingkasing ug istriktong miimplentar sa unsay hustong balaod diha sa ilang pagpangalagad agig paglaban sa interest sa gobiyerno. Aduna poy daghan, kinsa lugak ang pagpanerbisyo. Kulang sa kaisog sa pagbadlong ug paghimog epektibong aksiyon sa higayong adunay nabuhat kahiwian ang langyawng kompaniya nga ilang gimonitor.
Unang adlaw sa Misa de Gallo, pagsulod pa lang sa istriktong kawani sa ilang opisina, nakita niya ang naglarayng Christmas gift gikan sa kompaniyang langyaw aron ipanghatag ngadto nilang mga Pinoyng empleyado.
Aduna nay kompletong ngalan sa mga empleyado ang gamayng card nga gipapilit sa mga basket of joy. Gisulayan niyag pangita ang iyaha. Pero wala gyod siya mahiapil.
Ilang buotang manedyer, kinsa suheto sa kamaayo niya motrabaho, nangutana sa iyang secretary kon nganong wala siyay Christmas gift nga nag-submit man silag listahan sa mga Pinoyng empleyado?
Dali ra kaayong nakatubag ang secretary: “Ilang foreign management ang namili, Sir. Ang atong mga empleyado nga kusog mobantay, mohimog report ug hugot moimplementar sa hustong patakaran, wala nila apila.”
Ang istriktong kawani nga nakadungog sa maong pahayag, nakapahiyom sa tago.
Dinhi, iyang naklaro unsang matanga sa management ang maong langyawng kompaniya. Gusto kini og monitoring team nga lugak ug mahimo nilang mahigtan sa liog. Buwahan, kon may pagbawog sa patakaran nga himoon pabor sa ilang negosyo, walay mopugong kanila.
Usab, nailhan niya kinsang mga tawhana ang kulang sa kaisog pagprotehir sa katigayonan sa gobiyerno ug ang kahumok modawat og Christmas gift gikan sa nahisgotang kompaniya nga unta gidili man kini.
Ang pagpanawat og gifts gikan sa mga kustomer (ma-butang man, o salapi) maoy simpleng sinugdanan sa makalilisang nga korapsiyon. Dinhi masukod, kinsa ang lig-on, kinsa ang huyang?
Malipayon ang mga kauban sa istriktong kawani nga midala sa Christmas gifts sa ilang pagpamauli.
Samtang ang istriktong kawani, kinsa walay nakitang gibitbit, taas kaayo ang agtang nga naglakaw sa dalan tungod sa kinanindotang pinaskohan nga naangkon: ‘ang kalinis sa iyang pagkatawo diha sa diniyosnong pagpangalagad’.