EDITORYAL - Mas daghan, mas maayo

Tungod sa nagkadakong populasyon ug nagkahuot nga kadalanan tungod sa kadaghan sa mga sakyanan, mahinungdanon kaayo nga adunay daghang alternatibong transportasyon ang katawhan.

Karon nauso na og maayo ang habal-habal ug duna nay kompanyang Angkas nga mahimong sakyan sa mga gustong mas paspas nga paagi padung sa ilang mga destinasyon.

Samtang padayon pang giplano ang pagtukod og mass transport system sa nasud sama sa mga tren, monorail, light rail transits ug buses, ang pagsakay og motorsiklong pasaheroan ang usa sa madali sa mga sumasakay karon.

Ang gobiyerno pinaagi sa Department of Transportation mi-extend sa dry-run sa Angkas og dugang unom ka buwan. Ang DOTr naghimo og pagtuon kun unsa ka luwas nga matang sa transportasyon ang motorsiklo.

Importante kini nga pagtuon kay pinaagi niini masusi kun angayan bang himuong legal ang pagpamasahero gamit ang motorsiklo.

Dugay naman nga namasahero ang mga motorsiklo nga gitawag og habal-habal, apan wala gyud kini mahimong legal kay base sa Traffic law sa Pilipinas dili kini haom nga himuong pasaheroan.           

Ang gihimong pagtuon sa DOTr mao unyay basehan sa pagtangtang sa probisyon sa Traffic law sa Pilipinas nga nag-ingong dili luwas himuong pasaheroan ang mga motorsiklo. Usa sa labing maayong safety measure mao ang pagsigurong lisensyado, certified ug qualified gyud mo-drive og motor ang drayber. Kinahanglan sab sila nga suhito road safety ug traffic laws.

Kay niining paagiha lang masigurong dili sila magpataka lang og padagan kay sayod kay makasohan sila ug ang ilang kompanya mahimong mawagtangan og prangkisa o permit gikan sa gobiyerno.

Ang nakanindot niini, tungod sa extension nga unom ka buwan, may tsansa na sab nga makasulod ang uban pang kompanya nga susama sa Angkas motorsiklo usab ang gamiton sa paghatud og pasahero.

Kun daghan ang magkompetinsya hayan mas barato unya ang pletihan kay dili ma-monopoliya sa Angkas. Mas daghan, mas maayo.