E-jeep dili manukli

Mga electric jeepneys o E-jeep nga nagdagan na karon sa dakbayan sa Sugbo may uniporme nang plitehan base sa gipagawas-anunsiyo sa Land Transportation Franchising and Regulatory Board (LFTRB) Memorandum Circular (MC) 2019-061 nga giimplementar sugod sa miaging Miyerkoles, Disyembre 4.

Ang MC 2019-061, balaod nga naglangkob sa Fare Rates for Modern and Electric PUJ Services.

Ang gimandong minimum nga plitehan sulod sa unang 4 ka kilometro, P9.50 ra. Ug tag P1.08 ang mapuno matag kilometro nga mosunod.

Ang tumong ning napormang unipormeng plitehan sa mga electric ug modernong jeepneys aron kahatagag higayon ang tag-iya nga dili makabsan og sensilyong 50 sentabos nga magamit kanunay sa ilang drayber sa pagpanukli ngadto sa mga pasaherong may tibuok 10 pesos o pataas nga ibayad-plite.

Kinahanglan nga ang drayber, sayo sa buntag, magtiner og 50 sentabos nga ikasukli sa mga tibuok nga giplite.

May mga PUJ nga nagpapilit og sticker: ‘BARYA LANG PO SA UMAGA.’

Sa usa ka tan-aw, makaingon kang ang tuno niini, pamarayeg ra.

Pero kon palawman ang pagpamalandong, klaro ang linugdangan sa tinuorayng tumong – ang paghimo niining rason nganong dili na masuklian ang tibuok P10 og 50 sentabos. Oh, what a brilliant move!

Dili maayo ang maong hangyo nga gipaskin sa drayber.   Kay indirectly, nagsugo kini sa mga pasahero unsay buhaton aron mahimong komportable ang trabaho sa drayber.

Kabahin baya sa serbisyo sa drayber ang pagpanukli. Unya, nganong ipasa man iyang trabaho ngadto sa mga pasahero?

Sa laktod, iyang responsibilidad ang mag-andam og sensilyo. Ug dili sa pasahero.

Ang drayber maoy moalagad sa pasahero. Nungkang ang pasahero maoy moalagad sa drayber.

Usa ka Lauro Salaber, senior citizen, miduol nako ug misumbong sa iyang kahisagmuyo sa gibuhat sa mga e-jeep fare collector.

Kay kon tunolan niyag pliteng tibuok P10, di gyod siya sukliag 50 sentabos.

Kon tibuok P20, P10 ra gihapoy isukli.

Dugay na kuno ning gibuhat sa mga fare collectors. Ug dili kay siya ray gibuhatan sa ingon. Daghan.

LTFRB 7 Director Eduardo Montealto Jr., makiangayon pa kaha kining gibuhat sa mga e-jeep driver or fare collector ngadto sa mga senior citizens nga sama ni Lauro?

Intawon, maluoy ka, sumpoa na kining pagpamentaha nga ilang gihimo.