Dear Atty. Divine,
Duna koy illegitimate child ug naa nagdako sa iyang inahan ug ako kining gisuportahan. Apan lately, ang iyang inahan nadala sa tambalanan ug matud sa doctor nga nag-atiman kaniya duna kini mental problem or bipolar ang inahan sa bata. Duna sab kini suicidal tendencies kay makadaghan na kini mo attempt og suicide. Ang akong pangutana kun pwede ba nako kuhaon ang bata ug ako ang mo custody niini? Unsay akong buhaton aron makuha nako ang bata? Daghang salamat. —Johnny
Dear Johnny,
Kun dunay mental problem ang inahan sa imong anak pwede kini nimong kabasihan sa pagkuha sa custody sa bata ilabi na kun ang iyang problema sa pangisip nakaapekto na sa iyang pag atiman sa bata. Duna kay duha ka option, ang una, imong sabuton ang inahan sa bata ug ang iyang pamilya nga ikaw una ang moatiman sa inyong anak samtang nagpatambal pa ang inahan sa iyang sakit. Kun di kini mosugot, ang ikaduha nimong option mao ang pagdangop na sa korte pinaagi sa pag-file og Petition for Sole Custody sa imong anak apan kinahanglan kang mopresentar og ebidensya ngadto sa korte labot sa sakit sa inahan ug kun paboran sa korte ang imong Petition then pwede na nimo kuhaon ang bata gikan sa inahan. Thanks and God bless. —Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_ divina@yahoo.com ug akong tubagon ang inyong pangutana pinaagi sa akong column natag Miyerkules, Sabado ug Domingo