Maayo pa ang bagyo kay Tisoy

Sa pagbiya sa Bagyo’ng Tisoy nga adunay international codename nga Typhoon Kammuri, nakadulot kini ug tumang kadaot sa Bicol Region ug sa ubang bahin sa Pilipinas tungod sa kakusog sa hangin ug ulan nga gidala niini.  Samtang naghanduraw ang akong higala sa kadaot sa bagyo, nakatuaw siya sa pag-ingon: “Maayo pa ang bagyo, bisan dili tawo ug wala’y nawong, ginganlan pa ug ‘Tisoy’; apan ako intawon nga tawo, gawas nga dili ‘Tisoy’, ang akong nawong daw naagian pa jud og “bagyo”. Dili makiangayon ang kinabuhi!

Nailad sa kabayo-kabayo

Matud ni Presidente Duterte, dili kuno angayan mabalaka ang mga Pilipino sa giingon nga posibilidad nga manipulahon sa China ang power grid sa nasod gumikan sa kalambigitan sa naulahi sa teknikal nga operasyon sa National Grid Corp. of the Philippines (NGCP).  Midason usab ang tigpamaba sa Chinese Foreign Ministry nga si Geng Shuan nga ang way basehan ang maong alegasyon.  Dili kaha maisip nga usa ka Trojan Horse ang pagpanag-iya sa mga Tsino sa 40% sa NGCP? Basin sa atong pagkumpiyansa mahisama kita sa mga sundalo sa Troy nga nailad ra sa kabayo-kabayo mao nga naihaw ra mismo sa ilang nataran. Dili lang pud unta!

Nakabentaha tungod sa pag-oktaba

Sa paglagda sa Presidente sa balaod nga nag-oktaba sa eleksyon sa mga barangay opisyal ngadto na sa tuig 2022, namulong ang Provincial Election Officer sa Cebu nga nakabentaha niini ang mga naglingkod karon nga mga barangay opisyal tungod kay mahatagan sila ug panahon sa pag-implementar sa ilang mga programa. Nakabentaha tinuod ang maong mga opisyales apan dili sabton nga naay programa nga ipadayon.  Ang uban wala gayo’y nahimo, tungod kay (a) walay pundo, (b) kontra partido o (c) wala’y kabangkaagan sa panerbisyo, mao nga nagmika na lang. Alaut ang barangay nga nakabaton sa maong matang sa mga opisyal.

Sige ang panaway bisan kauban

Duha ka miyembro sa Nobel Literature Prize Committee ang miluwat sa ilang katungdan human nila gisaway ang giingon nga kahiwian sa Swedish Academy mahitungod sa pagpili sa mga mananaug.  Maanindot kini nga panig-ingnan sa tarong nga prinsipyo ug lig-on nga baruganan.

Dinhi sa Pilipinas, ang mga kritiko nagsige og panaway sa kagamhanan, bisan pa man kon sila empleyado ug sweldado sa gobyerno.  Nahisama sila sa mga tawo nga gipagyahan ug “Sige’ng mulo (saway), sige pud ang ‘timo’ (kaon).”  Padayon ang pagpahimulos!

Pwera gaba lang!

Segun sa balita, adunay 71 anyos nga pensyonado’ng Hapon nga gidakop sa kapolisan sa Tokyo tungod sa pagtawag niini sa makadaghang higayon ngadto sa telephone company nga KDDI.  Giingon nga miabot og kapin sa 24 mil ka higayon nga natala ang iyang pagpanawag sa rason nga buot niya nga mangayo ug pasaylo kaniya ang mga kawani sa maong kompaniya.  Aduna kita’y termino sa maong matang sa binuhat sumala sa iyang pangedaron kon magsige na ug pabadlong. Gitawag sila nato ug “GIANGO-ANGO.”.  Pwera gaba lang!