Di sala sa maestra ang pagdisiplina

“Sa ikauunlad ng bayan, disiplina ang kailangan.” Mao kini ang tagline ni anhing Pres. Ferdinand E. Marcos sa siya pay namunoan sa Pilipinas.

Sa iyang panahon, menus ang adik. Kay upawan man gani ang madakpan sa curfew, unsa na kaha ang mamaligyag marijuana?

Dili pareha karon. Bisag sa mga prisohan, nagpadayon ang sekretong pagpamaligyag shabu nga unta may mga polis mang nagbantay.

Sa listahan sa mga druglord ug drug protector ni Pres. Rodrigo R. Duterte, hasta kapila niya balikbalikag anunsiyo ang ngalan sa mga heneral, kinsa nahilambigit ning dautang kalihokan.

Kini nagpaila lang nga may mga heneral diay’ng walay disiplina sa ilang kaugalingon.

Kay inay gukdon ang mga gukdonon, kinsa maoy nakagusbat sa kaugmaon sa kabatan-onan, sila miipon-apil man hinuon.

Busa, unsaon pagkorek sa sayop, kon ang tigkorek nakig-abin sa nasayop?

Mao kini ang nahitabo niadtong Nobiyembre 18, Lunes. Usa ka apohan misumbong sa programa ni TV host Raffy Tulfo, nga gipakaulawan ug gipasakitan kuno iyang apo sa ilang maestra didto sa eskuylahan, diin gipagawas ang bata sa klasrom ug nag-inusarang gipalingkod palayo sa mga klasmets.

Unsaong wala man mauli iyang card ngadto sa maestra nianang adlawa mismo nga ting-uli. Hinungdan, nga nasuko ang titser.

Ug nabuhat ang naasoy na sa unahan nga wala magustoi sa apohan.

Hasta mga ginikanan sa bata miadto sab ni Tulfo. Gibalikbalik pagyagyag ilang reklamo, diin nangayog hustisya ug gustong patangtangan sa teacher’s license ang magtutudlo.

Mipahayag ang maestra nga ang tumong niya sa pagbuhat sa ingon, mao ra gyod ang paghatag og disiplina sa bata.

Apan hugtanong mipasangil ang apohan ug mga ginikanan, nga gipakaulawan ug gipasakitan gyod kuno sa titser ilang anak.

Ug gipapili ni Tulfo ang titser: “Tangtangan kag teacher’s license, Ma’am or kasohan kag child abuse?”

Kining paglaban sa apohan ug mga ginikanan sa bata batok sa maestra, usa ka dakong sayop.

Dapat, suportahan nila ang maestra ug pasabton ang bata nga ang gibuhat ni Ma’am husto kay kini para sa iyang kaayohan.

Nungkang, dapigan ug Dodongdodongon ang nagtubong bata sa iyang sayop!

Na’ay, Lola, kadiyot lang. Nakakita ka ba anang mga badlongong gipangtokhang? Gusto ka bang mapareha nila imong apo?