Ipautang na ang “pagtuo?”

Mihangyo ang mga kaparian sa Basilica Minore del Sto. Nino sa kagamhanan sa Dakbayan sa Sugbo nga hatagan sila ug pagtugot nga hawanan ang dapit nga adunay mga vendors labi na ang dalan sa D. Jakosalem agi ug pagpangandam sa Sinulog.  Kon tugotan sa dakbayan ang maong hangyo sa kaparian, dili ba kaha modangop na lang sa pagpanuroy sa kabalayan ang mga mamaligyaay ug imahen? Makadungog na unya kita sa ilang sales talk nga magkanayon: “Sto. Nino ug Birhen mo diha Noy, Nang, PAUTANG. Pwede ra four gives!”  Kadakong panamastamas kon mao!

Dili tataw ang utlanan

Giingon nga wala mauyoni ni Vice Mayor Mike Rama ang tipik sa gihimo nga “privilege speech” sa usa ka konsehal sa dihang gibatbat niini ang mga pangalan sa mga giingon’g biktima sa sexual harassment. Gipatangtang man tuod sa minutas sa session ang maong mga pangalan, apan nabati na kini sa kadaghanan. Katungod sa usa ka konsehal nga makahatag ug privilege speech apan aduna kini tugbang nga katungdanan.  Dili usahay tataw ang utlanan sa katungod ug sa katungdanan, mao nga usahay kinahanglan kitang pahinumduman.  Study pa more?

Kagamhanan ang labaw’ng mangandam

Miawhag ang PAG-ASA sa katawhan sa pagpangandam sa nagsingabot nga gituohan nga Super Typhoon dinhi sa atong nasud. Sa mga adunahan nga maingon ta nga luwas diha sulod sa ilang hari-anon’g pinuy-anan, sama sila sa Boy Scouts nga kanunay’ng andam (Laging Handa). Apan kadtong anaa nagpuyo daplin sa kasapaan, pag-ampo ra gayod ang ilang mahimo ug angay gani nga ang kagamhanan maoy mangandam alang sa pagtabang unya kanila.  Angay tingale ipunting sa PAG-ASA ngadto sa kagamhanan ang maong awhag sa pagpangandam. Na hala, Be Prepared na lang!

Mata ra ang nabusog

Gikataho nga ang kagamhanan sa Dakbayan sa Mandaue migasto ug balor P3 milyones alang sa pagpamutang og Christmas Lights ug décor sa City Hall ug sa ilang public plaza. Matud pa sa General Services Head nga si Marivic Cabigas, ang tumong sa maong pagpang-adorno mao ang “pagpa-hingangha” (amaze) sa mga Mandauehanon. Kon buhi pa ang akong apohan, hayan suplahon niya ang maong katuyoan pinaagi sa pag-ingon: “Mata ra ninyo ang nabusog, ang inyong tiyan nagkurog”.  May punto ‘sab ang akong apohan!

I-shut down o dili, paleho la!

Ang pag-shutdown sa cellphone signal atol sa kasaulogan unya sa Sinulog mardi gras ug ubang dagkong kalihokan posible na usab nga buhaton agi ug pagseguro sa kahapsay ug kalinaw sa Fiesta Senior.  Daghan na pud unya ang magbagulbol kay tungod sa kadaghan sa tawo, dako sab ang posibilidad nga magkatibulaag ang mga managkauban ug dili nga maghibalag dayon kay walay signal.  Apan karon pa lang, bisan wa pa i-shutdown, daghan na man gani ang nagreklamo tungod sa kahinay na daan sa signal nga daw sama ra ug napagngan na ang mga konsumidor.  Matod pa lage sa Intsik,  may signal o wala, “PALEHO LA”!