Dili pa lang dugay nahimong sumsoman sa social media ang nahitabo nilang Tulfo, sa magtutudlo ug ang ginikanan ug apohan nga nipa tulfo sa maong magtutudlo kay lagi ang rason gipagawas sa classroom ingon nga disciplinary action. Buot ni Tulfo nga ipatangtang ang lisensiya niini, sa laktod buot niyang pakulban sa kaldero ang maong magtutudlo. Kinsa man gyud ang sayop? Si Tulfo lang ba? Ang Ginikanan lang ba? Ang magtutudlo lang ba? O kitang tanan sayop ug nahimong salikwaot ug reactionary ra kaayo sa mga isyu nga wala dinhi ug wala adto.
Pagkaanaa
Kini ang unang isyu nga angayan natong tubagon. Matag ginikanan buot mohatag sa mga panginahanglan sa ilang mga anak ug kasagaran ilang gipaningkamotan ang ilang mga anak dili magantos sama sa ilang nahiagoman kaniadtong sila pa ang kabataan. Busa ang tanan buot nga mamahimong mas mapasayon ug mas mahimong paspas. Apan ang nasakripisyo niini mao man ang ilang presensiya kun ang ilang pagka-anaa sa mga higayon nga anak buot masayud sa tubag sa iyang mga yanong mga pangutana. Ang mga tanghaga nga kun dili mahatagan og igong pagatagad ang moresulta sa pasagad nga mga tubag.
Ang pagka-anaa gikinahanglanon baya kay ang gadgets ug uban pang mga kahimananang birtwal dili ug dili man gyud unta makatubag sa panginahanglang emosyonal. Mas bililhon ang presensiya kaysa kwarta kay mag-unsa man tuod kun anaa kay kwarta apan nahimong pakyas kita diha sa atong kinabuhing malambigiton.
Ginikanan
Dunay mga tarong ug dunay mga salbahis nga mga ginikanan. Dunay mga amahan nga mounay og buong sa dungog sa ilang mga anak. Dunay mga ginikanan nga magbagulbol sa higayon nga ang anak maningil sa ilanag mga paninanglan. Hinuon dili kita kabasol usab sanglit dunay mga higayon nga ang usa ka amahan o inahan mismo ang nibati og tumang kalibog kay sila usab mismo ang nahimong biktima usab sa ilang naghinobrang gugma ngadto sa ilang mga anak. Normal nga reaksiyon sa wala matataw nga isyu.
Tunghaan
Ang tunghaan mao ang ikaduhang pinuy-anan ug dinhi nag abot ang mga kabataan nga nagagikan sa nagkadaiyang mga panimalay. Sa ato pa, iya iya ang taras nga gihambin nila. Ang magtutudlo sa laing bahin ang naningkamot usab nga mo survive. Mao nga sa tinguha nga mamahimong maayo ang resulta sa ilang paningkamot gitinguha nila nga unta wad-on ang bisan unsa nga dili maayo nga binuhatan sa ilang kabataan kay lagi ang kabataan sa tunghaan mosalamin man pud sa paagi nga sila nagtudlo. Apan ang tanan nahimong madagasangan lamang kun dunay magpatuyang og tabi labina gyud sa social media.
Kitang tanan dunay ikatampo ning maong kahimtang. Apan usa lang ka butang ang atong makita luyo ning mga hitaboa ang disiplina nahimong krimen ug ang atong nasud nahimong padayong gitay-og. Sa laktod nahimong haguka ang tanan alang kanato….Mao nga only in the Philippines ang flag gihimong tablecloth.... Naunsa naman tawon ang atong nasud karon.