Diha sa matag balay o bisan asa anaa gyud ang boundaries.
Ang boundaries kinahanglanon kaayo aron imong mahatagan og igong pagtagad ang imong personal space ingon man alang sa imong kaugalingong kaayohan.
Matud pa, overfamiliarity breeds contempt. Apan daghanan kanato ang nahimong biktima sa gitawag nilang overfamiliarity.
Hangtud nga moabot ang panahon nga nahimong malisud alang nato ang paghipos sa atong kaugalingong vulnerability tungod kay kita mismo nahimong exposed ra kaayo sa kadaghanan nga kun buot hunahunaon wala makatugkad sa tinud-anay natong panginahanglan.
Sa nilabay’ng retreat sa kaparian gitataw gyud kaayo ang kamahinungdanon sa boundary ug privacy.
Mao ni ang hinungdan kun nganong diha sa kumpisalan anaa ang grille nga nag-uwang tali sa confessor ug sa penitent aron ma-establish ang boundary kun itandi sa face to face nga pamaagi. Butang nga dunay kamatuoran ug gibug-aton.
Ang personal space diha sa atong tagsa tagsa ka mga panimalay o trabahoan mao man ang naghatag kanato og kahigayonan sa pag-recharge sa atong kaugalingon gikan sa kakapoy ug sa stress. Ang personal space makatabang sa pagkaplag sa atong kaugalingon gikan sa uban.
Sa mga higayon nga bation nako ang tumang kakapoy, kabalaka, ug kapungot, ingon man kasubo, mogahin ako og panahon sa paghilom aron tidluman ko ang akong kahimtang.
Akong lingawon ang akong kaugalingon pinaagi sa pagbasa sa mga libro sa akong estante.
Apan dunay mga ideya nga lisud kaayo patidlumon sanglit lain man ang gisinggit sa akong galamhan.
Ang bugtong mahimo nako mao na lang ang pagpaminaw sa mga balud sa lapyahan sa kabaybayonan sa Sangi.
Nahimong paraiso ang yanong kaanyag ning maong dapit nga nakahupay sa akong gihambing kakapoy ug kalaay sa kinabuhi.
Ang matag katulog dili na matugaw sa urom sa mga kabalaka.
Ang matag paghinanok kahigayonan man sa bag-ong kalig-on ug kabaskog aron sa ingon makapadayon sa naandang lihok sa pagpangalagad.