Exodus sa mga nurses

Gikan sa Enero hangtud Septiyembre karong tuiga, 9,195 Filipino nurses ang mikuha sa US Licensure exam, sa tinguha  nga makatrabaho sa Ameria. Kadaghan ini!

Kun atong ibutang nga makapasar silang tanan, mawad-an kita dinhi sa atong nasud balig 9,195 nursing services. Mosamot kini sa kakulangon sa daan nagnihit nga mga nurses sa atong nasud.

Mao na ba kini ang giingon nga plight sa atong mga professional ngadto sa atong kanasuran? Atong nahibaw-an nga daghan na sa atong mga professionals ang atua na manarbaho ngadto sa ubang kanasuran.

Karon, ang gisaad nga usbaw sa sweldo sa mga nurses, wala kita masayud kanus-a kini ma-realized. Sama sa usbaw sa sweldo sa mga magtutudlo, walay nasayud kanus-a gyud kini nila matagamtami.

Luoy ra ba intawon ning atong mga magtutudlo, ang uban kanila mag-domestic helper dayon. Bida sad no, ang tig-umol ug tig-edukar sa atong mga bata aron mamahimong good citizens ugma damlag, himuon lang nilang mga domestic helpers didto? Usahay ila pang panamastamasan.

Resulta kini sa atong kakabus. Poverty, kawad-on. Hinumdom ko nga matag-assume sa bag-ong mapili nga Presidente, modeklarar dayon siya og war against poverty.

Pakpak dayon ta. Hangtud nga manumpa na lang pud ang laing Presidente, magpabilin ang atong kakabus. Ug lain na usab nga declaration of war against povery ang ilusad sa nagsunod nga mga Presidente.

In demand kaayo ang atong mga nurse didto sa ubang kanasuran, kini gumikan sa pagka-maayo nilang moserbisyo. Apan mas in demand sila dinhi sa atong nasud.

Hinumdom ko nga dihay usa ka topnotcher sa nurses’ board exams, sa pangutana kun mo-abroad ba dayon siya, iyang tubag: Mas gikinahanglan ako dinhi sa akong nasud.

Daku tingali nga sweldo ang iyang madawat abroad, apan, dili man kuno negosyo ang iyang pagpa-nurse, kundili, pag-alagad man. Busa, nganong adto man siya sa adunahang mga nasud moserbisyo.

Mao unta kini ang attitude natong mga professionals. Imagine, guwapo kaayo ta’g mga tunghaan dinhi. Mahitalay gyud ta among sa mga best educational institution sa Asia. Apan, we’re producing professionals for the other countries to hire. Hinuon dili kay kita ra nga nasud ang mga professional nanimpalad usab ngadto sa ubang kanasuran. Apan kita maoy kinadaghanan.

Pananglitan, sa atong gihisgutan dinhi nga nurses’ exams sa America, samtang 9,195 ka Filipino nurses ang mi-take sa exams, 1,064 r a ka Indian nurses; 805 Puerto Ricans, 638 South Koreans, ug 623 ka Nigerians.

Unsa man, ingon na ba niini ka kabus ang atong nasud nga nagkadaghan mang mga Pinoy ang buot nang mobiya sa nasud nilang natawhan. Matud pa, gi-validate na man sa Korte Suprema ang basic pay sa mga nurses at P30,531 (Salary Grade 15) nga gi-emloys sa gobiyerno sa Pilipino.

Apan, giingon nga “the considerably improved starting pay is not expected to hold back Filipino nurses from seeking vastly superior standards of living overseas, especially in North America.”

Sa laktud kuwang pa. Ilabina karon nga nagsige’g saka ang presyo sa mga palaliton.

Aniay observation ni John Bertiz, chair sa ACTS-OFW Coalition of Organizations: “We have many young, upwardly-mobile nurses and other health professionals who really want to live and work overseas, mainly in America and Canada.”