Pahigmata sa Katalagman

Dili lang usa kondili sunodsunod nga linog ang mitay-og sa Mindanao nga mimugna og grabeng kadaut sa kinabuhi ug panginabuhi sa mga tawo.

Niadtong tuig 2013 buwan gihapon sa Oktobre nasinati dinhi sa Visayas ilabi na sa Bohol ug Cebu ang 7.3 magnitude nga linog.

Hilabihan ka makalilisang ang atong nabatyagan, gani akong ma-recall ang experience dihang nagpa-prenatal mi sa akong asawa, hapit mi madat-ogi sa nahulog nga signage paggawas namo sa building.

Abi nako og kataposan na sa kalibutan niadtong tungora kay mabati man gyud ang hinagubhob sa yuta nga kuwang nalang moliki og lamyon ang mga tawo.

Dunay mga pagtay-og nga nasinati apan mga aftershocks lang pero kusog gihapon, hangtod karon mabitian gihapon nako ang murag lipong nga pamati tungod sa pag-uyog sa yuta.

Didto sa Mindanao bisan og 6.5 magnitude ang ilang nasinati apan grabe na og kadaut ang namugna, gisamotan pa nga gisundan pa og laing mga linog ang mitay-og.

Kadtong mga edipisyo nga nangadaut o nangagabok na sa unang linog misamot ka hagba sa sunod sunod nga pagtay-og.

Dili nako ma-imagine ang gibating kalisang sa mga tawo didto tungod sa ilang na experience.

Dili lang sa lawas kon dili emotional, psychological nga trauma ang anaa kanila sa walay makatupong nga kabalaka kay basin naa na usay linog nga mahitabo.

Kining matang sa katalagman dili ra ba gyud mahibaw-an kay wala may pasidaan dili sama sa bagyo nga masayran kanus-a motugpa.

Unsaon man sa atong gobierno ang pagpangandam sa ingon niini nga katalagman? kutob ra sa mga disaster exercise nga inig abot na sa panghitabo malimtan na tungod sa kakuyaw.

Sa structural integrity sa mga building, ibutang nato nga makaagwanta ra kini sa usa ka pagtay-og apan lahi na kon sunodsunod nga linog ang mahitabo.

Ang linog sa Mindanao sa buwan sa Oktobre murag na timing lang seguro nga oktobre sad nahitabo sama niadtong sa tuig 2013.

Human baya niadtong linog sa Visayas, misunod dayon ang gamhanang bagyo nga si Yolanda.

Simbako dili lang pud unta kini mahitabo nga dunay laing super calamity nga masinati kay bisan unsaon seguro sa pagpangandam makamugna gyud kini og grabeng kadaut.

Basta ang kinaiyahan na ang mokastigo wala na gyuy mahimo ang mga tawo pag sagang.

Apan naay labing gamhanan nga hinagiban aron dili matagamtaman ang kabangis sa katalagman.

Kini mao ang pag ampo. Siguro mobiaybiay ang uban nga moingon lupig pay pari ning nagsuwat ani apan alang sa mga tawo nga dunay dakong pagsalig sa Ginoo, walay gamhanang katalagman nga dili mapugngan kon ang gahum sa pag-ampo ang gamiton nga taming.

Usahay gikinahanglan nga adunay mga panghitabo nga maoy mopukaw sa nahikalimot nato sa atong patuo aron subli kining mapahinumduman nga naa diay Siya nga andam modawat ug manalipod kanato.