Buhis sa inasinang pagkaon maka-HB

Mikagot ang bag-ang sa mga magbubuhis dihang gipahibalo sa Department of Health Undersecretary Eric Domingo nga hasta asin nga itempla sa pagkaon gusto niya nga pabuhisan.

Matud niya, ang asin mao kunoy hinungdan sa sakit nga hypertension, heart disease ug kidney diseases. Ug pinaagi sa pagkargag buhis sa mga salted foods, makahatag kunog maayong resulta sa atong panglawas. Hinuon, estudyohan pa.

Unya, may nangutana kon hasta ang buwad danggit (daing), apilon ba sab pagpatong og buhis?

Ania ang tubag ni Domingo: “Yes it should be included. It will include all foods.” Nga sa ato pa, kutob sa pagkaon nga templahag asin, buhisan. Mao ba?

Morag may nota sa kayabag ang tuno ning iyang gipamahayag, da!

Kini gong danggit (daing) nga giingon ni Domingo, dili man tanan giasinan. Naay unsalted. Apilon ba diay gihapon ni?

Ang presyo sa danggit puwerte nang mahala. Ug mosamot pa ang pagsaka niini kon mahimo nang balaod ang Salted Food Tax bill. Pangutana: Segurado ba nga kon taasan ang presyo ning mga pagkaon nga binutangag asin, wala nay mangaon?

Sama sa asukar o kamay nga mao pod ang hinungdan sa sakit nga diabetes ug sa sigarilyo nga makakanser sa baga, gikargahan kinig excise/sin tax. Wala na bay miinom og beer, sopdrinks?  Ug wala na bay nanigarilyo? Haskang paita sa linugdangan!

Tungod sa grabeng pagsaka sa presyo sa asukar nga maoy resulta sa walay kaluoyng excise/sin tax, ang tanang consumer maoy nagbaguod sa kabug-at ug pagpas-an ning matang sa krus nga binuhat sa tawo.

Sultian tika, Usec. Domingo, bisag mimahal nag maayo ang sigarilyo ug may NO SMOKING LAW pang gibak-ap, minilyon gihapong Pinoy ang nanigarilyo. Nga sa ato pa, ang pag-impose og tax sa mga in demand nga butang o pagkaon sama sa imong giplano nga buhisan ang mga salted foods, dili kini mao ang pulidong sulbad nga makawagtang sa sakit nga hypertension, kidney and heart diseases.

Sa laktod, ang pagpatong og buhis sa mga salted foods dili makaayo sa panglawas, kondili, makahayblad hinuon pagsamot. Tiaw bay, tungod nimo, ang presyo sa asin mosamot kamahal?

Overtaxed na intawon ang mga tawo, uy! Unya, imo pang pun-an? Please, don’t!