Ang sam-ang ug kita

Inihap na lang ang mga adlaw ug ato na pud saulogon agig paghandum ang Todos Los Santos ingon man ang adlaw sa tanang mga matuohon nga nangamatay. Kun makasulti pa lang ang patay siya tingali magkanayon:

“Kagahapon, anaa ako sa imong gibarugan karon, ugma nia kana sa akong gihigdaan karon!” Nga sa ato pa diay kitang tanan, mga kandidato diay sa kamatayon.

Mao nga walay angayang ikapanghambog kay kita dunay kaugalingong sukdanan ug atong kinabuhi mamahimong tapuson daw sama sa kandila lamang. Gani kun maningil ang kinaiyahan wala gyud tay dag-anan.

Ang linog ug katalagman sa Mindanao nakapakurog gyud nato. Walay maayong laki kun ang kinaiyahan na gani ang maglagot.

Kitang tanan mga vulnerable gyud. Ning maong kapasikaran, ang bugtong mahimo nato mao ra gyud ang pagpangandam. Dunay nagkadaiyang matang sa lubong.

Dunay lubong nga inatiman tingali samtang buhi pa ang gilubong nagbuhat siya og maayo mao nga angayan lamang nga siya atimanon bisan gani sa iyang kamatayon. Dunay uban nga wala na gyud atimana dili tungod kay dautan sila samtang buhi pa, basin insensitive lang gyud ang iyang pamilya o dili ba kaha way kwarta.