Ang panaw sa Anislag

Sabado mao nga nibangon ko og sayo kay mangandam sa kulbahinam nga panaw padung sa Anislag. Ang Anislag mas layo pa sa Cambais apan ang nakanindot lang kay medyo sayonsayon lang ang dalan niini, dili sama sa Cambais nga tungason kaayo. Apan bisan pa sa malisud nga dalan padayon gihapon ang katawhan sa ilang paghudyaka kay lagi kasaulogan man sa ilang kapistahan.

Ang panaw usa ka kasaulogan. Kun maghisgot kita og kasaulogan nagpasabot kini nga duna kay kauban. Sa among panaw padulong sa Anislag kuyog nako ang akong mga batos. Samtang naglakawlakaw kami, among gihimo ang kukabildo, inubanan ang pagpadayganay sa mga hunahuna ug mga panahom.

Sa kadugayan nihunong ko tungod sa kakutas. Daw dili na nako madala ang akong mga batiis sa pagbaktas. Nahinumdom nuon ko sa Amazon Basin diin nahimong isyu karon didto sa Roma ang mahitungod sa Viri Probati (Proven Men) diin ang mga minyo nga lalaki aron lamang mahatagan og kahigayonan nga masaulog ang Santos nga Misa ang paga-ordinahan sa pagkapari.

Naghunahuna pud sila sa dakong posibilidad nga himoon ang ordinasyon alang sa mga babaye aron himoong mga dyakonesa. Butang nga nakapahaling og kisaw ilabina gyud sa mga habig sa mga konserbatibo. Kun ugaling mahitabo ni, mamahimong usbon na ang Catechism.

Matud pa sa Paragraph 1577: “Only a baptized man (vir) validly receives sacred ordination. The Lord Jesus chose men (viri) to form the college of the twelve apostles, and the apostles did the same when they chose collaborators to succeed them in their ministry. The college of bishops, with whom the priests are united in the priesthood, makes the college of the twelve an ever-present and ever-active reality until Christ’s return. The Church recognizes herself to be bound by this choice made by the Lord himself. For this reason the ordination of women is not possible.”

Daghang mga babaye ang nikuyog kanako sa akong apostolado. Ug kun ugaling moabot kini dinhi sa ato daghan na gyud tingaling mga babaye nga mamahimong pari. Bunga sa kakutas nipahuway ako ug kuyog niini ang akong pag-ampo nga unta lamdagan sa Espiritu Santo ang mga anaa sa Amazon.

Timailhan na ba kaha kini nga ang simbahan kinahanglang mousab sa iyang pagtulon-an aron lamang sa pag-atubang sa panginahanglan sa kasamtangan? Andam na ba kaha ang kadaghanan? Salamat sa Anislag nga nakahatag kanako og kahigayonan nga pangutan-on ang akong kaugalingon kalabot sa Amazon Synod.