Abswelto na

Nalipay ko kay wa gyud madayon pagkatangtang sa CITOM si Ricardo Barandog, ang igsuon ni Major Chuck Barandog.

Maayo kay nakasabot ra si Mayor Labella nga gihimohimoan ra og pasangil si Ricardo Barandog nga kuno nangilkil sa mga tag-iya og cargo truck.

Ang rason nga gibutangbutangan og pasangil si Ricardo Barandog mao nga aron siya matangtang sa CITOM ug “tuloy ang kanilang ligaya” sa mga nalambigit og negosyo sa trucking services nga ang mga sakyanan “dakponon.”

Kagahapon, giimbitar ko sa akong higala nga si Erwin Gok-ong, ang chairman sa Cebu Market Vendors and Development Cooperatives, kay pista man sa Carbon Market Unit 3, ug didto nagkita mi ni Barandog.

Nasuko man gud ang mga truckers kang Barandog kay gipaspasan man pagpanakop ang ilang mga sakyanan. Natural nga dakpon kay wala man makatuman sa mga lagda nga gilatid sa Transportation and Traffic Code. Wala gyud masayop si Mayor Edgardo Labella sa iyang hukom nga dili tuohan ang reklamo sa mga truckers ug ipabilin sa katungdanan si Barandog.

* * *

Ang mga konsehal nga in-charge sa Cultural and Historical Affairs angay gyud unta nga mohimo og ordinansa nga aron mapanalipdan ang mga karaang tunnel sa mga Hapon nga gihimo kaniadtong ikaduha nga gubat sa kalibutan.

Daghang tunnel sa mga Hapon dinhi sa Sugbo, apan wala lang gyud tagda. Diha sa Barangay Lahug dunay tunnel nga nahulpa gani ilawom sa kabalayan, apan ambot og hain ang iyang entrada.

Sa Sitio Banawa, sakop sa Barangay Guadalupe, dunay dako nga tunnel nga gihimo kaniadto sa mga Hapon nga ilang ospital.

Nindot kaayo ang pagkahimo sa maong tunnel diha sa Banawa ug may hulagway ko niini nga gihuptan. Apan karon, giingon nga ang tunnel giguba tungod kay ang nahimutangan gitukoran na man og hotel.

Anugon kaayo nga nawala na ang mao nga tunnel nga kabahin sa atong history sa gubat sa mga Hapon. Duna pay tunnel nga anaa ilawom sa Cebu Normal University nga molagbas sa Osmeña Boulevard ug mopaingon sa ilawom sa Abellana National School.

Ambot og tinuod ba nga ilawom sa Kapitolyo may tunnel sab kuno ang mga Hapon. Pero duol sa Barangay Hall sa Busay ang tunnel gihimo man nga septic tank sa akong amigo. Gianugnan gyud ko.

Nahibaw-an nako nga sa Barangay Buhisan may mga tunnel usab ang mga Hapon. Giestahan kini sa mga subdalo g Hapon nga naglangkob sa “first layer” o “first line” sa ilang depensa.”

Diha sa kabukiran sa Sugbo, daghan pa nga tunnel sa mga Hapon nga angayang panalipdan aron dili gub-on sa mga tawo.

Unta, sugdan na kini sa paglihok sa atong mga konsehal sa dakbayan sa Sugbo ug dili nila paabuton nga mahurot sa pagkaguba ang maong mga tunnel.

Didto bitaw sa kaulohan, ang lawom kaayong tunnel nga gihimo kaniadto sa mga Amerikano ug gibanos sa mga Hapon, karon gibantayan gyud da kagamhanan.