Ang saysay ni Jun

Sa pundok sa mga Hijos de San Jose dunay kauban nga ginganlan og Jun.

Siaw kini nga tawo ug sige lang og ngisi murag way suliran nga gihambin.

Apan sa dihang iyang gisaysay ang iyang sugilanon sa kinabuhi nakaingon ko nga tinuod gyud diay ang grasya nga kun palihukon lang makahatag gyud og kausaban sa kinabuhi sa tawo.

Dugang pa, sulod sa mga higayon sa pagkahisalaag iyang nakita ang kamot sa Dios nga milihok sa iyang kinabuhi.

Salamat sa  mga kaubanan sa buhat sa Hijos de San Jose ug sa mga tawo nga nagpakabana nga sulod sa mga panahon sa pagsulay nahimong smooth sailing ang tanan. Ug panahon na alang niya nga mobalik sa sabakan sa simbahan ug mohulip sa iyang mga pagkuwang kanhi.

Matag tawo masalaag man gyud. Ang atong mga desisyon sa kinabuhi usahay labina kun atong pasagdan ang atong emosyon nga maoy modumala kanato.

Natural dunay mga higayon nga ang atong kalagot maoy nakapahimo sa atong kinabuhi nga alimuot ug ang atong nag uros uros nga gugma maoy nakapabuta nato sa hilabihan. Mao nga kun masipyat awh ulahi gyud ang pagmahay.

Sa laing bahin, ang pagpaambit ni Jun maoy timailhan nga kun hatagan lang og kahigayonan ang matag usa nga mabag-o wa na gyud unta kinahanglana ang bilanggoan.

Kun hatagan lang ang matag usa og kahigayoanan nga mopadayag sa iyang kaayo nan, wala na unta kinahanglana ang silot.

Apan sayud kita nga lisud kining mahitabo. Samtang anaa pa sa matag usa kanato ang dili hamtong nga pagbati nan, mamahimong daw salingkapaw lamang ang tanan. Nawala ang panaghiusa. Bisan kun wala na tuod ang balangay system apan padayon gihapon ang iya iya ug ako ako nga mentalidad. Kay iya man nang tinuyoan aw angayan lamang nga moantos siya  sa linugdangan maoy kasagaran natong rason.

Subo palandungon kay ang pulong panginlabot nahimo mang halayo alang kanato….. Salamat sa maong paambit ug salamat sa Hijos de San Jose! Bisan pa man kun usahay kamo pagatawgon og: “HIJOS DE TAGAY!”

* * *

I am a businessman

Mao kini ang pasiatab sa tawo nga kanhi nahimong kabahin sa adunahang banay. Sa tanto niyang paningkamot nahimong naluya ang iyang kasamdan sa dihang nakita niya ang iyang kaugalingon gumikan sa usa ka dakong Pakyas.

Pakyas siya ang tungod di siya maantigong maminaw kanila na nasayud sa iyahang kahimtang. Wala mahimong tinuod ang tanan niyang pangagpas. Ang paghigmata uwahi na kaayo kay nasanapan naman kini sa dakong balighot sa tawhanong kahaguka.

Di kini mahitungod lang sa pagbaton og ginansiya o kita. Mahitungod kini sa paghimo sa bisan unsa nga atong kinabuhi. Higugmaa ang tawo, gamita ang kwarta, dili kay gamiton ang tawo aron higugmaon ang kwarta.