May awit nga akong nakat-onan sa akong pagpuyo dinhi sa Sangi. Ang awit ning San Jose nga nagkanayon:
“San Jose imo kaming panlabanan sa kinabuhi ug sa Kamatayon!” (2x)
Kini tungod kay si San Jose man gud mao man ang among patron nga manlalaban. Sa kapanahonan ni Fr. Blurred iyang gitukod ang Hijos de Jose ingon nga kahugpongan sa mga kalalakin-an. Apan ang maong pundok ang wala na moaktibo pa. Sa akong pag-abot dinhi akong gihimo nga mabanhaw kining maong pundok nga kasagarang mga sakop mga amahan. Mao nga ako silang gitawag aron akong tigumon. Tuyo nako nga unta sila mamahimong mga abyan sa ilang tagsa tagsa ka mga pamilya kondili usab ngadto sa tanang mga kabatan-onan.
Sa mga prusisyon nga kalihukan sila ang angayang saligan, sa paugnat sa kusog sila ang manlimbasog ug labaw sa tanan sa matag pamilya panahon sa gabii sila ingon nga mga amahan ang angayang sangpiton. Kini tungod kay may gipasiugdahan ko dinhi nga pamaagi nga ang matag amahan sa panimalay ang sa dili pa matulog ang mohimo og pagbendisyon sa ilang banay. Sa dili pa mobiya ang ilang mga anak padung sa ilang tagsa tagsa ka mga lakaw.
Ang matag ginikanan dunay spiritual authority ngadto sa ilang mga anak ug sa bisan unsa nga giisip nga ilang kabtangan. Mao nga sila dunay gahum sa paghatag og panalangin o pagtunglo. Mas maayo gyud ang manalangin kay sa motunglo dili man kini makaayo labina kun ang imo intawong anak wala sa kahimtang sa grasya ang madutlan ra gyud intawon.
Sa akong pagandam-andam sa maong kalihukan nakita ko ang akong kaugalingon nga nisulod sa tagsa tagsa ka mga puloy-anan ug kinabuhi sa akong mga parokyano. Dili aron akong but-an ang ilang kinabuhi kondili aron akong sintion ang panalangin sa Dios diha sa ilang kinabuhi.
Sa laing bahin daw sa matunaw ang akong kasingkasing sa dihang nakita ko sa YouTube ang usa ka amahan nga bisan basurero siya ug lisud ang panginabuhian iyang napahuman ang iyang mga anak. Pakita lamang kini nga ang kinabuhi sa tawo dili diay masukod sa iyang kahimtang kondili sa iyang determinasyon nga mohimo og kalainan. Ang matag amahan kun maningkamot lang makatabang gyud sa pamilya ug kun ang matag amahan tinubdan sa kalig-on, nan mamahimong lig-on ang pamilya. Ug ang makapalig-on niini mao man ang pagsilsil sa dakong bili sa Diosnong presensiya mismo diha sa pamilya.
Salamat ni San Jose nga mitabang ug mibulig niini. Siya isip ama ama ni Jesus atong Ginoo ang nipakita sa kaligdong, kakugi, ug gugma nga angayan lamang sundon sa matag sumusunod ni Jesus nga nitugot nga amomahon ug panggaon sa usa ka yano apan balaang panday. San Jose imo kaming panlabanan sa kinabuhi