EDITORYAL - Alternatibong solusyon

Grabe ang traffic, grabe ang polusyon ug gagmay ang mga dalan apan padayon gihapon ang pagdaghan sa mga sakyanan matag adlaw mao nga daw wala nay kataposan kining problemaha.

Sa pagkakaron, ang nahunahunaan sa gobiyerno mao ang pagmando sa tanang Local Government Units nga mag-clearing operations sa tagsa-tagsa nila ka kadalanan gikan sa mga street vendors hangtud na sa mga illegal nga estraktura ug illegal parking.

Apan murag kuwangon pa gihapon kini nga mga lakang kay kadugayan maghuot gihapon ang mga karsada kay padayon man ang pagdawat ug pagrehistro og bag-ong mga sakyanan.

Tinuod negosyo ug may buhis nga makuha ang gobiyerno gikan sa mga mahalin nga sakyanan, apan ang buhis daw wala man makaapas sa pagpatukod sa mga gikinahanglang imprastraktura nga haom sa gidaghanon sa mga sakyanan nga nagdagan karon sa kadalanan.

Gawas sa mga bag-ong sakyanan, duna pa gihapoy daghang mga sakyanan nga karaan na kaayo.  Pribado ug mga public utility vehicles apan makapahibulong nga estrikto man unta ang pag-renew sa rehistro sa mga sakyanan.

Kani bang mga pribadong smoke emission testing centers mobalibad kaha sa mga sakyanan kun itom na og aso ang gibuga? Nangomisyon baya sila sa matag sakyanang modangop kanila pagpa-renew sa rehistro.

Guba na kaayo ang uban apan nagdagan gihapon, giunsa man kaha nila paglusot sa inspeksyon sa motor vehicle inspection service (MVIS)?

Ang pagtukod og mga dugang karsada ug pagdugang niining mga modernong matang sa transportasyon tinuod long-term solution sa problema sa traffic ug sa kakulang sa public transport system.

Apan dugay kaayo kini mahuman ug makatabang sa kasamtangang problema.  Maayo sab tingaling lingion kining pag-estrikto sa renewal sa mga rehistro sa mga sakyanan. Kun kutob lang 15 ka tuig ang PUJs, 12 ka tuig sa mga V-Hires, mao sab unta sa ubang pribadong mga sakyanan kay mas paspas kini og resulta.