Gamhanan gyud ang pulong. Matud pa ang pulong mao man ang timaan sa atong gihunahuna. Ang bisan unsang ideya dili hisabtan kondili nato kini mapadayag ngadto sa uban pinaagi sa bisan unsang mogawas sa atong baba o bisan unsa nga atong isulat.
Sa laing bahin ang bisan unsa nga malibkas nato mao man ang molatid sa atong gisulti. Mao nga dunay usa ka babaye nga nikalit lang og tibi human niya madungog ang pulong nga nalibkas gikan sa iyang hinigugma bunga sa kasuko niini.
Ang hinigugma nga nakakita sa pagpanglugmaw sa mga luha gikan sa mga mata sa iyang minahal ang nalukmay og nangayo og pasaylo human sa maong hitabo.
Butang nga nakapahigmata kaniya sa dili na gyud pagpaturagas og yawyaw bisan pa man kun anaa siya sa kasuko. Nalibkas ang mag dautang pulong tungod lang sa way hinungdang selos. Mao nga ang iyang hinigugma giligo gyud niya sa iyang mga halok ug kinasingkasing gakos. Timaan sa iyang pagbasol. Kun ato kining ilambigit sa atong kinabuhi dunay mga punto nga angayan natong hinuklogan.
1.Una, seguorha nga ang mogawas nga mga pulong sa imong baba mahinungdanong ug dili mga balikas, tunglo ug uban pa. Kay daghang mga relasyon nga nangaguba tungod sa way hinungdang mga pulong.
2.Ikaduha, aninawa kun ang imong sultihan sa ingon makadawat ba sa imong gipanulti basin baya kun ang iyang pagbati dili andam sa pagdawat niini.
3.Ikatulo, way kumo kun pulos mga maayo lang gyud ang atong yawiton. Way mawala kanato kun panalangin lamang ang atong bungaton.
Mubo ra gyud ang kinabuhi busa angayan lamang nga ato kining saulogon uban ang malipayong pagbinayloay sa mga panalangin ug mga pulong makapadasig.
Duna ‘toy nagkanayon nga duna siyay gasa tungod kay maksulti man siya og lain laing pinulongan apan sa dihang siya nagyawyaw na niini bisan siya ang wa man makasabot.
Tingali kaha aron mogawas nga siya gifted ug sa maong panghunahuna nahimong dili kasarangan ang iyang gipanulti bahala na og siya mismo ang wa makasabot ni makatugkad niini. If you have nothing more important to say then don’t say it.